«Այսօր Սամվել Վարդանյան անուն-ազգանունով մարդու չէ, որ կալանքի միջնորդություն են ներկայացրել ու ուզում են կալանքի տակ պահել, այսօր քաղաքացիական դիրքորոշումը, քաղաքացիական դիրքորոշման ու ազատ խոսքի արտահայտումն է, որ տանում են հերթական անգամ կալանավորելու: Այն, ինչ տեղի է ունեցել, սովորական դեպք չէ, որ քաղաքացին օրենք է խախտել ու էլի ապօրինի կամ կիսաապօրինի կալանքի որոշում են կայացնում: Մարդուն նսեմացրել են, նրա նկատմամբ դատարանից դուրս հաշվեհարդար են իրականացրել:
Այսինքն՝ ՔՊ-ն հավաքվել է, ՔՊ վարչությունը կամ ՔՊ-ի լավերը մի երկու հոգով հավաքվել են, որոշել են դատավճիռը, Ալեն Սիմոնյանը հրապարակել է այդ դատավճիռը, հետո իրականացրել են: Իշխանությունն ինչ դեմք ունի, մենք գիտենք, բայց ամենաահավորն այն է, որ գտնվում են յան ազգանունով մեր կողքին ապրող մարդիկ, որ այդ նույն դիմակն են ստանում: Այդ հրամանները կատարողներն էլ են չէ՞ մարդիկ, էնքան հետաքրքիր է, այդ մարդիկ ծնող, կին երեխաներ ունե՞ն, այդ մարդիկ, որ երեկոյան գնացել են տուն, ի՞նչ են ասել: Իրե՞նք էլ են բարոյականության, հայրենիքի կենաց խմում, իրե՞նք էլ են ասում՝ մենք աշխատում ենք: Ամեն իշխանություն կարող է բռնապետության վերածվել, մենք դրա նախադեպերն ունեցել ենք: Խնդիրն այն է, որ այդ հրեշի դեմքը արդեն հարյուրավոր մարդիկ վերցնում ու այդ դիմակը հագնում են ու նմանվում հրեշի:
Փաստորեն, Նիկոլ Փաշինյանն ու իր թիմը հանցակից է դարձնում, գնում է Ոսկեպար, ոսկեպարցուն ուզում է հանձնելու հանցակիցը դարձնի, ոստիկանություն՝ իր հրեշավոր բանդիտիզմի մասնակիցը դարձնի: Սամվել Վարդանյանը հիմա ուղերձ է հանրությանը՝ տեսեք ձեր հետ ինչ կկատարվի, եթե համարձակվեք երկիրը կործանման եզրին հասցրած ուժին գնահատական տաք»,- լրագրողներին հետ զրույցում ասաց ԱԺ «Հայաստան» խմբակցության պատգամավոր Քրիստինե Վարդանյանը՝ անդրադառնալով «Քաղաքացիական պայմանագիր» խմբակցության պատգամավոր Հակոբ Ասլանյանին վիրավորած Սամվել Վարդանյանի դեպքին:
Հիշեցնենք, որ պատգամավորի հետ ունեցած վիճաբանությունից հետո Վարդանյանին ձերբակալել էին, հետո դիմակավորված անձինք ծեծել ու ստորացրել:
Կարդացեք նաև
Արփինե ՍԻՄՈՆՅԱՆ
