Կառավարության այսօրվա նիստում որոշում ընդունվեց, որով վերանայվում է բուհերի ընդունելության գործող կարգը։
ԿԳՄՍ նախարար Ժաննա Անդրեասյանն ասաց, որ փոփոխությունը պայմանավորված է ընդունելության սկզբունքների վերանայման նոր մեխանիզմների մշակման եւ դրանց ներդրման ռազմավարական նպատակներով։
«Տավուշի մարզում 2021-2022 թվականի ուստարվանից փորձարկվում է հանրակրթության նոր չափորոշիչը, եւ այս ուսումնական տարում մենք արդեն ունենք նոր չափորոշչով իրենց ուսումնառությունն ավարտող առաջին շրջանավարտները։ Հետեւաբար, այս պահին ընդունելության կարգում անում ենք փոփոխություններ, որոնք հնարավորություն կտան մեր առաջին շրջանավարտներին արդեն անցնել ընդունելության նոր համակարգով։ Եվ Տավուշի մարզի հանրակրթական դպրոցների շրջանավարտների համար կսահմանվեն բուհեր ընդունելության նոր հնարավորություններ, ինչը հանդիսանում է նաեւ կրթության ոլորտի այս կարեւոր փոփոխությունների բաղադրիչ, որի համաձայն՝ նոր կրթական չափորոշիչներով ուսումնառության ավարտին դպրոցի ավարտական քննությունները կհանդիսանան նաեւ բուհի համար ընդունելության քննություններ։ Կարգավորման նպատակը նաեւ այն է, որ հենց այս տարվա՝ 2023-2024 թվականների ուստարվա ավարտից թեստերը, որով կազմակերպվում են քննությունները, նոր ձեւաչափով կիրառվեն եւ համապատասխանեն չափորոշչի բովանդակությանը։ Եվ դա նաեւ այս նոր թեստային համակարգի փորձնական ներդրումն է՝ ուղղված նոր ծրագրային նյութի վերջնարդյունքների գնահատմանը։ Եվ արդեն դրա արդյունքները, որպես ավարտական քննություններ, հիմք կհանդիսանան բուհ ընդունելության համար։ Իսկ 2026 թվականից այս համակարգն արդեն կգործի մեր բոլոր շրջանավարտների համար»,- նշեց Ժաննա Անդրեասյանը։
Նա հավելեց, որ սա Տավուշի մարզի դպրոցների համար հավելյալ հնարավորություն է։ Տավուշի մարզի դպրոցների շրջանավարտները, ինչպես հանրապետության մյուս դպրոցների շրջանավարտները, ունեն միասնական քննություններ հանձնելու երկու հնարավորություն, եւ սա կլինի հավելյալ երրորդ հնարավորություն, որը կկազմակերպվի հուլիսի սկզբին։
Կարդացեք նաև
Նիկոլ Փաշինյանը հարցրեց․ «Այսինքն՝ մեր ռազմավարական պատկերացումն այն է, որ ընդհանրապես ընդունելության քննություն չի լինելո՞ւ»։ Ժաննա Անդրեասյանն ի պատասխան ասաց․ «Կարծում ենք, որ պետք է աստիճանաբար գնանք այն մեխանիզմով, որ բուհերը սահմանեն ընդունելության նվազագույն պահանջներ, եւ մեր դիմորդները բավարարեն դրանք»։
Ռոզա ՀՈՎՀԱՆՆԻՍՅԱՆ
