Արևմուտքը Հարավային Կովկասում կործանարար օրակարգ է քարոզում, որի նպատակն է մասնատել տարածաշրջանը և քանդել պատմական կապերը Մոսկվայի հետ. РИА Новости-ին ասել է ՌԴ ԱԳՆ պաշտոնական ներկայացուցիչ Մարիա Զախարովան, անդրադառնալով Ջեյմս Օ’Բրայենի հայտարարությանը, թե ԱՄՆ-ն պայմաններ է ստեղծում, որ Հայաստանն ավելի հեռանա Ռուսաստանից։
«ԱՄՆ հայտարարություններն այն մասին, թե Հայաստանը ցանկանում է Ռուսաստանից երես թեքել, մերկապարանոց են, Ռուսաստանի և Հայաստանի՝ դարերի ընթացքում ձևավորված կապերը կդիմանան բոլոր փորձություններին, որոնց անընդհատ ենթարկում է Արևմուտքը», – նշել է Զախարովան։
«Ինչ վերաբերում է Ջեյմս Օ’Բրայենի մերկապարանոց հավաստիացումներին, թե Հայաստանը ցանկանում է երես թեքել Ռուսաստանից, ապա դա ամերիկացիներին բնորոշ աշխարհաքաղաքական ճարտարագիտության հերթական օրինակն է՝ համաշխարհային հանրության աչքում ստեղծել Վաշինգտոնին անհրաժեշտ «իրականություն», որը ոչ մի ընդհանուր բան չունի իրականում տեղի ունեցողի հետ»,- ասել է Զախարովան։
«Դարերի ընթացքում ձևավորված կապերը մեր երկրների միջև կդիմանան բոլոր փորձություններին, որոնց անդադար ենթարկում է Արևմուտքը… Պատմության ընթացքում մենք քանիցս օգնություն ենք տրամադրել եղբայրական հայ ժողովրդին, մտադիր ենք դա անել նաև այսուհետ»,- նշել է ՌԴ ԱԳՆ պաշտոնական ներկայացուցիչը։
