Հայաստանի իշխանությունները Արաքս գետի վրա պատնեշի կառուցումն ավելի քան մեկ տարի համաձայնեցնում են Թուրքիայի հետ։ Այդ մասին կարելի է դատել Հայաստանի տարածքային կառավարման և ենթակառուցվածքների նախարարության պատասխանից։
«Արաքս գետը նախկին հուն վերադարձնելու նպատակով Բուրաստան և Արաքսավան համայնքների շրջանում ամբարտակի կառուցման վերաբերյալ տեղեկացնում ենք, որ ՀՀ ԱԳՆ–ի միջնորդությամբ շարունակվում է նախագծային փաստաթղթերը թուրքական կողմի հետ համաձայնեցնելու գործընթացը», – հայտնում է գերատեսչությունը` պատասխանելով Sputnik Արմենիայի հարցմանը:
Նշենք, որ դեռևս 2024 թվականի հունվարին նախարարությունից մեզ հայտնել էին, որ ամբարտակի կառուցման նախագիծն անհրաժեշտության դեպքում համաձայնեցվում է Թուրքիայի հետ։
Խնդրի վերաբերյալ հարցում էինք ուղարկել նաև նույն թվականի հուլիսին և ստացել արդեն «ավանդական» պատասխանը՝ նախագծային թղթերը Թուրքիայի հետ համաձայնեցման փուլում են։
Կարդացեք նաև
Ավելի վաղ գրել էինք, որ Արաքսավան և Բուրաստան համայնքների շրջանում Արաքս գետը նախկին հուն վերադարձնելու համար ամբարտակի կառուցման արժեքը կկազմի մոտ 1 մլն դոլար:
Հիշեցնենք, որ ավազի ապօրինի արդյունահանման հետևանքով Արաքս գետը, որով անցնում է Թուրքիայի հետ սահմանը, փոխել է հունը, և դրա սահմաններից դուրս ձևավորվել է մոտ 400 հա մակերեսով կղզի:
Խնդիրներից խուսափելու համար նախարարությունն առաջարկել է Արաքս գետի ներկայիս հունի վրա կառուցել մոտ 130 մ երկարությամբ և 8 մ խորությամբ ամբարտակ-պատնեշ՝ գետի ջրերը նախկին հուն ուղղելու համար:
