«Մենք ասում ենք, ասել ենք, որ միջանցքային տրամաբանության հետ կապված որևէ զարգացում չի լինելու և չկա և չի կարող լինել։ Նկատեցի, որ իր խոսքում ԱՄՆ նախագահը, այնուամենայնիվ, corridor բառն օգտագործեց, բայց դա աշխարհում այնքան ընդունված բառ է։ Էն տրամաբանությունը, որ մենք ունենք այդ բառի հետ կապված, աշխարհում սովորական է ընդունվում, ձեզ հայտնի հանգամանքների բերումով այդ բառը մեզ համար որոշակի լարվածություն է ստեղծել»,-Սպիտակ տան հանդիպումից հետո, պատասխանելով Վաշինգտոնում գտնվող հայ լրագրողների հարցերին, այսպես պարզաբանեց ՀՀ վարչապետ Նիկոլ Փաշինյանը։
Նա վստահեցրեց՝ սա այն դեպքն է, երբ մենք հյուսիս-հարավ ճանապարհային միջանցք բառակապակցությունը գիտենք, որը մեր փաստաթղթերում կա, բայց այն միջանցքային տրամաբանությունը, որի հետ կապված քննարկումներ եղել են, ակնհայտորեն չի լինելու․ «Այն, ինչ խոսում ենք և պայմանավորվել ենք, կարևոր է արձանագրել, որ տեղի ունեցածի հետ կապված որևէ մեկնաբանություն, որևէ ընկալում ունենալիս պետք է հենվել տեքստի վրա։ Այն հրապարակվել է։ Այն, ինչ չկա տեքստում, ուրեմն չկա»։
Հիշեցնենք՝ Նիկոլ Փաշինյանի և Իլհամ Ալիևի հետ Սպիտակ տանը կայացած հանդիպումից հետո համատեղ մամուլի ասուլիսի ժամանակ ԱՄՆ նախագահ Դոնալդ Թրամփն իր խոսքում օգտագործել էր «միջանցք» արտահայտությունը։
Կարդացեք նաև
Նա նշել էր․ «Այս հռչակագրով նախատեսվում է այն, ինչ ինձ համար մեծ պատիվ է, որ կոչվում է Թրամփի ուղին՝ հանուն միջազգային բարեկեցության, որը տարանցիկ գոտի է, որը թույլ կտա Ադրբեջանին հասանելիություն ստանալ իր՝ Նախիջևան տարածքին՝ միաժամանակ հարգելով ՀՀ-ի ինքնիշխանությունը։ Իրենք այսպիսով կկարողանան ապրել ու աշխատել միասին։ Զարմանահրաշ, կարևոր, առանձնահատուկ տարածք է երկուսի համար էլ։ ՀՀ-ն բացառիկ գործընկերություն է ստեղծում ԱՄՆ-ի հետ, որ զարգացնի այս միջանցքը, որը կարող է մինչև 99 տարի ժամկետով երկարաձգվել։ Խոստացել են 99 տարուց հետո էլ 99 տարով երկարաձգել։ Մենք ենթակառուցվածքային լուրջ զարգացումներ ենք ակնկալում ամերիկյան ընկերությունների կողմից, որոնք անհամբեր սպասում են մուտք գործել երկու երկրներ և մեծ գումար ծախսել, որը տնտեսական մեծ օգուտ կբերի երեք երկրների համար։ ՀՀ-ն և Ադրբեջանը հանձն են առնում հավերժ դադարեցնել ցանկացած կռիվ, բացել առևտրային ճանապարհները, դիվանագիտական հարաբերություններ հաստատել, հարգել միմյանց ինքնիշխանությունը և տարածքային ամբողջականությունը»։
Տաթև ՀԱՐՈՒԹՅՈՒՆՅԱՆ
Լուսանկարը՝ ՀՀ կառավարության
