Ապրիլի 14-ին ՄԹ-ում ՀՀ դեսպան Վարուժան Ներսեսյանը հանդիպել է Արտաքին գործերի, համագործակցության և զարգացման հարցերով ստվերային նախարար Վենդի Մորթոնի հետ։
Դեսպան Վ. Ներսեսյանը ներկայացրել է Հարավային Կովկասում տեղի ունեցող տարածաշրջանային զարգացումները և ընդգծել, որ օգոստոսի 8-ի Վաշինգտոնյան հռչակագրի ոգով Հայաստանը շարունակում է խաղաղության հաստատմանն ուղղված ջանքերը, այդ թվում՝ տարածաշրջանային կապերի ընդլայնման միջոցով։ Նա շեշտել է TRIPP նախաձեռնության ներուժը՝ տարածաշրջանային կապերը խթանելու և Հարավային Կովկասի տնտեսական ու տարանցիկ ավելի լայն հնարավորություններն օգտագործելու գործում։
Զրուցակիցները քննարկել են նաև հայ-բրիտանական հարաբերությունների դրական դինամիկան, որի շրջանակում դեսպան Ներսեսյանը վերահաստատել է երկկողմ կապերի հետագա խորացման հանդեպ Հայաստանի հետաքրքրությունը՝ հիմնվելով անցյալ տարի հայտարարված՝ հարաբերությունները ռազմավարական գործընկերության մակարդակի բարձրացման վերաբերյալ պայմանավորվածության վրա։
ՄԹ-ում ՀՀ դեսպանություն
