Քաղաքական, տնտեսական և սոցիալական հետազոտությունների հիմնադրամի (SETA) ավագ հետազոտող Մուրատ Ասլանը նշեց․ «Թուրքիան չի ուզում տարածաշրջանում որևէ երկրի տեսնել մեկուսացված»։
«Երբ խոսում ենք վստահության, հուսալիության մասին, կարևոր է, որ հույզերի վրա չխաղանք, այլ իրատես լինենք։ Կարող եք հանրային մակարդակում պատմական մեղադրանքներ հնչեցնել, քննադատել, դատապարտել, բայց հարցին պետք է իմաստնությամբ մոտենանք։ Թուրքիայի ՀՆԱ-ն 1,64 տրիլիոն դոլար է»,- «Երևանյան երկխոսություն» միջազգային երրորդ համաժողովի «Բացելով Հարավային Կովկասը – նոր տնտեսական հորիզոններ» խորագրով պանելային քննարկման ժամանակ այսպիսի կարծիք հայտնեց Քաղաքական, տնտեսական և սոցիալական հետազոտությունների հիմնադրամի (SETA) ավագ հետազոտող Մուրատ Ասլանը։
Նա համեմատության համար նշեց՝ ՌԴ-ից բացի՝ բոլոր Կենտրոնական Ասիայի ինը երկրները՝ Իրանը ներառյալ, նրանց ՀՆԱ-ների համագումարը 1,1 տրիլիոն դոլար է․ «Այսինքն՝ Թուրքիան հանդես է գալիս թե՛ արտադրող, թե՛ սպառող։ Այս առումով, այնպիսի նախագիծ, որը ԹՐԻՓՓ-ն է, կամ ՀՀ-ի ինտեգրումը տարածաշրջանում միանշանակ կնպաստի Թուրքիայի տնտեսությանը։ Այս տեսլականը պետք է հստակեցվի լայն առումով։ Թուրքիան չի ուզում տարածաշրջանում որևէ երկրի տեսնել մեկուսացված։ Մեր տնտեսությունները, հասարակության կառուցվածքը որևէ օգուտ չեն քաղում կամ չեն կարող անվտանգ ապագա տեսնել, եթե կա մեկուսացված երկիր։ Ուստի Թուրքիան հուսալի գործընկեր է խթանելու ՀՀ-ի ինտեգրումը տարածաշրջանում։ Կան մի շարք ռիսկեր ու խոչընդոտներ․ պետք է վերջ դրվի դարեր շարունակ տևող մեղադրանքներին և վիճաբանություններին, պետք է իմաստնությամբ մոտենանք»։
Կարդացեք նաև
Նա նշեց, որ կողմ է բանակցությունների 3+3 ձևաչափին․ «Մենք չենք կարող Հարավային Կովկասը համաշխարհային համատեքստից առանձին դիտարկել։ Եթե խոսենք ռիսկերից, ապա ՌԴ-ն և Իրանն են։ ԽՍՀՄ փլուզումը ռուսները որպես տրավմա ընդունեցին։ Իսկ երբ մեկուսանում ես, դա հանգեցնում է փլուզման, և այդ դեպքում դիմում ես ագրեսիայի։ Տեսնում ենք ռուսներին հիմա Ուկրաինայում, հարցնում են՝ հաջորդը ո՞րն է լինելու՝ Ղազախստա՞նը, Մոլդովա՞ն, այլ երկիր։ Աշխարհագրական սահմանագծումները դժվար է հասկանալ, ՌԴ-ի տրամաբանությամբ ցանկացած հետքաշում այս տարածաշրջանում ռիսկ է։ Իրանին շրջանցելը ևս ռիսկային է»։
«Բացելով Հարավային Կովկասը – նոր տնտեսական հորիզոններ» խորագրով պանելային քննարկումն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
