Այսօր Գյումրիում մեծ հանդիսավորությամբ նշվեց մայիսի 9-ը՝ Հաղթանակի տոնը, որին նվիրված միջոցառումները համատեղ ուժերով կազմակերպել էին Գյումրու քաղաքային իշխանության ու 102-րդ ռազմաբազայի ներկայացուցիչները։
Հայրենական մեծ պատերազմում տարած հաղթանակի 81-րդ տարեդարձի առթիվ նրանք նախ այցելեցին թիվ 2 գերեզմանատանը գտնվող եղբայրական գերեզմանոց, այնուհետ «Պատվո բլուր» զինվորական գերեզմանատուն՝ խնկարկելով, ծաղիկներ խոնարհելով պատերազմի նահատակների շիրիմին։
Գերեզմանոցում հոգեհանգստի կարգ կատարեց ուսական102-րդ ռազմաբազայի հոգևոր սպասավոր հայր Տիմոֆեյը։
Կարդացեք նաև
Այնուհետ Գյումրու 8-րդ զինվորական թաղամասից մեկնարկեց «Անմահ գունդ» քայլերթը, որի մասնակիցները շարժվեցին դեպի «Մայր Հայաստան» հուշահամալիր՝ պատերազմում նահատակված իրենց հարազատների, պապերի լուսանկարները վեր պարզած։
«Մայր Հայաստանում» տեղի ունեցավ մեծ միջոցառում, ռազմահայրենասիրական երգերի ներքո ցուցադրվեց ռազմաբազայի զինտեխնիկան, հնչեցին ելույթներ, այնուհետ ծաղիկներ ու ծաղկեպսակներ խոնարհեցին «Անհայտ զինվորի» հուշարձանին։
Այստեղ կար նաև հյուրասիրություն․ «ռազմաճակատային խոհանոցից» մատուցվեց հնդկաձավարի շիլա և ռուսական ավանդական սալո։
Նունե ԱՐԵՎՇԱՏՅԱՆ
