ՀԱԿ վարչության անդամ, քաղաքագետ Տաթև Զորյանի ֆեյսբուքյան գրառումը
Փաշինյանը ոգևորությամբ հայտարարում է Ախալքալաք-Կարս երկաթուղու բացման մասին, սակայն լռում է դրա իրավական և քաղաքական կառուցվածքի մասին.
1.Ադրբեջանական մենաշնորհ
Բաքու-Թբիլիսի-Կարս երկաթուղու վրացական հատվածը (ներառյալ` Ախալքալաքի կայարանը) կառուցվել և արդիականացվել է Ադրբեջանի պետական նավթային հիմնադրամի (SOFAZ) հարյուրավոր միլիոնների հասնող վարկերի հաշվին։ Համաձայն նախագծի պայմանագրերի՝ Ադրբեջանն ունի ուղղակի տնտեսական և իրավական լծակներ այդ գծի շահագործման վրա։ Ուստի, Թուրքիան և Վրաստանը չեն կարող Հայաստանին լիարժեք և անվտանգ տրանզիտային հնարավորություն տալ մի ճանապարհով, որի ֆինանսական կառավարիչն ու հիմնական բաժնետերը Բաքուն է։ Ադրբեջանը ցանկացած պահի կարող է տեխնիկական, սակագնային կամ անվտանգային պատրվակներով արգելափակել հայկական բեռների շարժը, ինչը Հայաստանին կդնի լիակատար կախվածության մեջ թշնամական պետությունից։
Կարդացեք նաև
2. «Չինաստանի և Եվրոպայի հետ կապի» աշխարհագրական աբսուրդը
Հայտարարության մեջ նշված լոգիստիկ երթուղիները քաղաքականապես և տնտեսապես անիրատեսական են.
Դեպի Չինաստան՝ Ադրբեջանով և Ղազախստանով. սա կոչվում է «Միջին միջանցք» (Middle Corridor)։ Փաշինյանը հպարտանում է մի երթուղով, որտեղ հայկական բեռները պետք է անցնեն Ադրբեջանի ցամաքային տարածքով, հասնեն Բաքվի նավահանգիստ, այնտեղից լաստանավով կտրեն Կասպից ծովը, հասնեն Ղազախստան և նոր միայն՝ Չինաստան։ Սա տնտեսապես ամենաթանկ, ամենաերկար և լոգիստիկ առումով ամենաբարդ ճանապարհն է, որը հայկական ապրանքները կդարձնի բացարձակ անմրցունակ բարձր ինքնարժեքի պատճառով։
3. Դեպի Եվրոպա՝ Թուրքիայի տարածքով
Թուրքիան այսօր ինքն ունի լրջագույն խնդիրներ սեփական երկաթուղային ցանցի թողունակության և դեպի Եվրոպա բեռնափոխադրումների սակագների հետ։ Հայաստանի համար սահմանի բացումը չի նշանակում ավտոմատ ինտեգրում եվրոպական շուկային, քանի դեռ չկան հստակ միջազգային երաշխիքներ, որ հայկական բեռների նկատմամբ չեն կիրառվի խտրական սակագներ։
4. TRIPP նախագծի իրական էությունը և Հայաստանի սուվերենության կորուստը
Ամենավտանգավոր մանիպուլյացիան TRIPP նախագծի ներկայացումն է որպես «տնտեսական հրաշք»։ Իրականում TRIPP-ն ԱՄՆ-ի կողմից առաջ մղվող նախագիծ է, որի գլխավոր նպատակը Իրանին և Ռուսաստանին տարածաշրջանային մեծ լոգիստիկ նախագծերից մեկուսացնելն է։ Փաշինյանը հայտարարում է, որ TRIPP-ի շրջանակում բացվելու է Նախիջևանով դեպի Իրան երկաթուղին, ինչն ակնհայտ սուտ է և հակասություն։ TRIPP-ի տրամաբանությունը բացառում է Իրանի դերի մեծացումը Սյունիքի միջանցքային նախագծերում։
5. Ինքնիշխանության կորստի իրական վտանգ
Փաշինյանի նշած «առաջիկա բացումները» (Հայաստան-Թուրքիա, Հայաստան-Ադրբեջան) TRIPP նախագծի տակ իրականում ենթադրում են Սյունիքով անցնող երթուղու նկատմամբ արտաքին վերահսկողության սահմանում։ Սա ոչ թե Հայաստանի հաղորդակցությունների ապաշրջափակում է, այլ Հայաստանի տարածքի տրամադրում թուրք-ադրբեջանական տանդեմի և արևմտյան օպերատորների գլոբալ տնտեսական շահերի սպասարկման համար՝ առանց ՀՀ սուվերեն իրավունքների երաշխավորման։
