«Ոչ թե մեխանիկական քարտեզը պետք է վերցնես գծես, մկրատով կտրտես, այլ անվտանգությունն է ամենակարեւորը: Մենք դրսում մեր դիրքորոշումը առաջ տանելու այնքան հիմքեր ունենք: Մեր հողերը, արոտավայրերը, որ օկուպացիայի տակ են, մարդիկ չեն կարողանում հող մշակել, մեր երեխեքը, օրինակ, Շուռնուխում ու Ներքին հանդում սովորում են դպրոցում, նայում ես պատուհանից՝ ադրբեջանական դիրքն է երեւում»,- այսօր Կապանում ՀՀ անվտանգային խնդիրներին անդրադառնալով՝ ասաց «Միասնության թեւեր» կուսակցության առաջնորդ, վարչապետի թեկնածու Արման Թաթոյանը:
Նրա խոսքով՝ պետք է այդ հարցերը բաժանենք խմբերի ու դիմենք միջազգային կազմակերպությունների. «Երեխեքը, որ չեն կարողանում ապահով սովորել դիմենք երեխաների պաշտպանությամբ զբաղվող միջազգային կազմակերպությունների, հողերի հետ կապված՝ գյուղացիների իրավունքների պաշտպանությամբ ՄԱԿ-ի մարդու իրավունքների խորհուրդ ու բազմաթիվ տեղեր կան… Միջազգային օրակարգը այս ամեն ինչով պետք է լցնել: Ոչ մի սահմանազատում օրինական չէ, եթե արվում է մարդու իրավունքների հաշվին »:
Կարդացեք նաև
Թաթոյանը նաեւ նկատեց, որ հարցի լուծող է պետք, լուծման ձեւը իմացող է պետք. «Ոչ թե կանգնես ասես՝ գիտես ինչ, օկուպացիայի տակ են, չի լինում սահմանազատում: Եթե դու թողեցիր մնաց այսօրվա սահմանազատման փուլի վրա, գրի սառույցին, ոչ մի բան չի լինելու, պետք է միջազգային հանրությամբ ճնշես իրենց»:
Կապանում քայլերթը Թաթոյանն ամփոփեց իրեն ուղղված կապանցու բարեմաղթանքով. «Սիրուն, սիմպատիչնի տղա ես: Քո ծաղկման իսկական շրջանն է, որ հանրապետություն ղեկավարես»:
Արփինե ՍԻՄՈՆՅԱՆ
