ՆԳ նախարարի տեղակալ Արմեն Ղազարյանը հունիսի 4-ին ընդունել է Ֆրանկոֆոնիայի միջազգային կազմակերպության ընտրությունների դիտորդական առաքելության պատվիրակությանը՝ Ֆիլիպ Կուրարի գլխավորությամբ։
Արմեն Ղազարյանը ներկայացրել է ՆԳ նախարարության պատասխանատվության շրջանակն Ազգային ժողովի առաջիկա ընտրությունների կազմակերպման և անցկացման գործընթացում՝ անդրադառնալով Ոստիկանության, ինչպես նաև Միգրացիայի և քաղաքացիության ծառայության կողմից իրականացվող աշխատանքներին։
Նշվել է, որ Միգրացիայի և քաղաքացիության ծառայությունն ավարտել է ընտրական ցուցակների ճշգրտման և վերջնականացման աշխատանքները։ Միաժամանակ, Ոստիկանությունը ընտրատեղամասերում և դրանց հարակից տարածքներում կիրականացնի ծառայություն՝ ապահովելով հասարակական կարգի պահպանումն ու ընտրական գործընթացի անխոչընդոտ ընթացքը։
Անդրադառնալով ընտրական գործընթացում ներգրավված անձնակազմի պատրաստվածությանը՝ ՆԳ նախարարի տեղակալը նշել է, որ ոստիկանության ծառայողները լիովին պատրաստ են ապահովելու ընտրությունների անվտանգ և անխափան անցկացումը։
Կարդացեք նաև
Արմեն Ղազարյանի խոսքով՝ ՆԳ նախարարությունն ավարտել է հիմնական նախապատրաստական աշխատանքները և պատրաստ է երաշխավորելու քաղաքացիների ընտրական իրավունքի ազատ ու անխոչընդոտ իրացումը, ինչպես նաև ընտրական գործընթացի բնականոն կազմակերպումը։
Ֆիլիպ Կուրարը բարձր է գնահատել ՆԳ նախարարության կողմից իրականացված նախապատրաստական աշխատանքները և վստահություն հայտնել, որ ընտրությունները կանցկացվեն ազատ, թափանցիկ և ժողովրդավարական չափանիշներին համապատասխան։
Կողմերը քննարկել են նաև փոխադարձ հետաքրքրություն ներկայացնող այլ հարցեր։
