«Հայրենիք» կուսակցության անդամ, փաստաբան Սոս Հակոբյանը գրում է.
«Ընտրական օրենսգրքի համաձայն՝ քաղաքական ուժի գրանցված նախընտրական ցուցակը չեղյալ համարելու երկու ընթացակարգ կա․
ցուցակը ուժը կորցրած ճանաչելու,
ցուցակը անվավեր ճանաչելու մասին։
Ինչքան «Հանրապետություն» կուսակցության ներկայացուցիչների բացատրություններից հասկացա, երկու հիմքն էլ դիմումի մեջ առկա է։ Բացատրությունից ակնհայտ է նաև, որ գրանցումն ուժը կորցրած ճանաչելու պահանջը վերաբերում է նախընտրական հիմնադրամի միջոցներին վերաբերող կանոնների խախտմանը։
Կարդացեք նաև
ԸՕ 27-րդ հոդվածի 5-րդ մասը նախատեսում է նման հիմք, որը վերաբերում է՝ ԿԸՀ-ի կողմից կիրառված տուգանքների չափը նախընտրական հիմնադրամի ծախսերի թույլատրելի վերին շեմը (800 մլն դրամ) ավելի քան 20%-ի չափով գերազանցելուն։ Նման պարագայում ԿԸՀ-ն իրավունք ունի դիմել վարչական դատարան (ինքնուրույն վերջնական որոշում չի կայացնում)՝ գրանցումը ուժը կորցրած ճանաչելու պահանջով։
Ինչու այս հիմքը չի աշխատի։ Նախ, հիմքի համար անհրաժեշտ են նախադրյալներ․
քիչ ցույց տված ծախսի կամ շեմը գերազանցելու հիմքով ուժի մեջ մտած վարչական ակտի (ԿԸՀ տուգանքի) առկայություն, որը չկա։ Եթե անգամ ԿԸՀ-ն որոշի նման տուգանք հիմա կիրառել, ուժի մեջ մտնելուց առաջ կլինի բողոքարկման հնարավորություն,
Բացի այդ, 03.06.2026 թ. ԿԸՀ-ն իր եզրակացությամբ փաստել է, որ բոլոր մասնակից քաղաքական ուժերն իրենց նախընտրական ծախսերը կատարել են օրենքով նախատեսված կարգով և չափերով։ Հետևաբար, դիմումով պետք է ներկայացված լինեն նոր փաստեր, որոնց առկայությանը դժվար է հավատալ,
ԸՕ մի քիչ խառնիճաղանջ 48-րդ հոդվածից բխում է, որ ԿԸՀ-ի կողմից կայացված որոշումը (այդ դեպքում կարող է լինել որոշում՝ դատարան դիմելու կամ չդիմելու և վարույթը կարճելու մասին) կողմերը կարող են բողոքարկել երեք օրվա ընթացքում։
Ուստի, այս հիմքով ներկայացված դիմումը իրավական որևէ հեռանկար չունի։ Ուժը կորցրած ճանաչելու դիմումի մի շարք այլ հիմքեր կան, որոնք ներկայում կիրառելի չեն, հետևաբար դրանց անդրադառնալու կարիք չկա։
Ներկայացուցիչները նաև նշել են՝ գրանցումը անվավեր ճանաչելու հիմքի մասին, սակայն մանրամասներ դրա վերաբերյալ չեն ներկայացրել։
Այնուամենայնիվ, անվավեր ճանաչելու հիմքերն ավելի անհավանական են. դրանք վերաբերում են ի սկզբանե ԿԸՀ ներկայացված փաստաթղթերի կեղծված լինելուն։ Դրանցից՝ կուսակցության համագումարի և մշտապես գործող ղեկավար մարմնի իրավազորության բացակայության կամ համապատասխան որոշումներն ընդունված չլինելու հիմքերն էլ կրկին պետք է հաստատվեն դատական կարգով։
Ուստի, այս փուլում «Ուժեղ Հայաստան» դաշինքի գրանցումը ուժը կորցրած կամ անվավեր ճանաչելու համար որևէ ողջամիտ իրավական հնարավորություն առկա չէ»։
