Ձորաղբյուրի 29/46 ընտրական տեղամասում քվեարկեց Հայաստանի Շնորհապետական կուսակցության նախագահ և վարչապետի թեկնածու Գուրգեն Սիմոնյանը: Նա կրկին ասաց, որ մի քանի սցենարի են պատրաստ, սակայն ակնկալիքներն այս ընտրություններից բավականին դրական են: «Ես կարծում եմ, որ շատ մեծ հնարավորություն կա լուրջ հաջողություն արձանագրելու, որը կլինի նաև Հայաստանի ու հայ ժողովրդի հաջողությունը»,- հավելեց նա:
«Քվեարկել եմ հանուն կայուն ապագայի, հանուն հավասարակշռված խաղաղության, հանուն արժանապատիվ առօրյայի և կենցաղի, որին արժանի է մեր հանրությունը: Ժամանակն է դառնալ ինքնիշխանությունն օրեցօր ամրապնդող և ուժեղ Հայաստան»,- նշեց Սիմոնյանը:
Նա ասաց նաև, որ խորհրդարան անցնելու իրենց շանսերը գնահատում է շուրջ 70 տոկոս: Ինչ վերաբերում է այլ ուժերի հետ համագործակցությանը, հիշեցրեց, որ չեն համագործակցի, իր բառերով՝ նախկին 3 նախագահների, ներկայիս վարչապետի քաղաքական ուժերի և նրանց սպասարկող արբանյակ քաղաքական գործիչների ու ուժերի հետ. «Համագործակցությունը կոալիցիայի առումով բացառվում է: Բայց եթե կբերվի օրինագիծ, որը մեր ծրագրին համահունչ է, ինչու չէ, կարելի է քվեարկել այդ օրինագծին կողմ»:
Հայաստանի Շնորհապետական կուսակցության նախագահի ձևակերպմամբ՝ եթե իրենցից բացի ևս մեկ այլ մաքուր ուժ հայտնվի խորհրդարանում, իրենք չեն բացառում նրա հետ համագործակցությունը: Ինչ վերաբերում է մյուսներին, դեռ պետք է ապացուցեն, որ մաքուր են:
Կարդացեք նաև
Պատրաստեց Գոհար ՀԱԿՈԲՅԱՆԸ
