ԱԶԳԱՅԻՆ ԺՈՂՈՎՐԴԱՎԱՐԱԿԱՆ ԲԵՎԵՌԻ ՀԱՅՏԱՐԱՐՈՒԹՅՈՒՆԸ
Հայաստանի Հանրապետությունում մամուլի դեմ ճնշումների և խոսքի ազատության սահմանափակման վերաբերյալ
2026 թ. հունիսի 5-ին՝ Ազգային ժողովի ընտրություններից ընդամենը երկու օր առաջ, իրավապահ մարմինները ներխուժել են «Արմատ-Մեդիա» լրատվամիջոցի գրասենյակ, իրականացրել խուզարկություններ, առգրավել գույք և աշխատակիցների հեռախոսներ, ապա կնքել լրատվամիջոցի տարածքը՝ փաստացի դադարեցնելով դրա գործունեությունը։
Թեև Ազգային ժողովրդավարական բևեռը շատ հարցերում տարակարծիք է «Ուժեղ Հայաստան» քաղաքական ուժի հետ, այդուհանդերձ դատապարտում է իշխանությունների այս քայլը։ Տվյալ դեպքում խնդիրը քաղաքական համակրանքը կամ հակակրանքը չէ, այլ սկզբունքը։
Կարդացեք նաև
Խորհրդարանական ընտրություններից անմիջապես առաջ լրատվամիջոցի գործունեության փաստացի դադարեցումը պետական ուժային կառույցների միջոցով լուրջ հարված է ընտրական գործընթացին և մամուլի ազատությանը՝ անկախ տվյալ լրատվամիջոցի քաղաքական դիրքորոշումից կամ սեփականատիրոջ իրավական կարգավիճակից։
ԱԺԲ-ի խորհուրդը պահանջում է․
- անհապաղ վերականգնել «Արմատ-Մեդիա»-ի բնականոն գործունեությունը,
- վերադարձնել առգրավված սարքավորումներն ու աշխատակիցների հեռախոսները, եթե դրանց պահպանումը բացարձակ անհրաժեշտ չէ քննության համար,
- ապահովել, որ որևէ քրեական վարույթ չօգտագործվի որպես լրատվամիջոցի գործունեությունը սահմանափակելու կամ ընտրական գործընթացի վրա ազդելու գործիք։
Մենք կոչ ենք անում Հայաստանի Հանրապետության մարդու իրավունքների պաշտպանին, Կենտրոնական ընտրական հանձնաժողովին, ԵԱՀԿ/ԺՀՄԻԳ դիտորդական առաքելությանը, ինչպես նաև Հայաստանում հավատարմագրված դիվանագիտական ներկայացուցչություններին անհապաղ ուշադրություն դարձնել տեղի ունեցածին։
Ժողովրդավարությունը չափվում է ոչ թե իշխանությանը համակրող, այլ իշխանությանը քննադատող ուժերի իրավունքների պաշտպանությամբ։
Ազգային ժողովրդավարական բևեռի խորհուրդը վերահաստատում է իր համոզմունքը, որ ազատ մամուլը, քաղաքական մրցակցության հավասար պայմանները և օրենքի գերակայությունը Հայաստանի Հանրապետության ինքնիշխանության ու ժողովրդավարության հիմնասյուներն են։
Հավատ։ Հայրենիք։ Ինքնիշխանություն։
Հայաստանը սակարկության ենթակա չէ։
Ազգային ժողովրդավարական բևեռի խորհուրդ
