Եվրոպայի խորհրդի խորհրդարանական վեհաժողովի (ԵԽԽՎ) տարեկան նստաշրջանի երրորդ մասի աշխատանքներին մասնակցել է ՀՀ ԱԺ պատվիրակությունը՝ կառույցում ԱԺ պատվիրակության ղեկավար Ռուբեն Ռուբինյանի գլխավորությամբ:
Նստաշրջանում ելույթ է ունեցել ՀՀ ԱԺ պատվիրակության անդամ Սոնա Ղազարյանը:
«Հարգելի՛ գործընկերներ, հարգելի՛ նախագահ,
Ես միշտ համոզված եմ եղել, որ ԵԽԽՎ-ն այն հարթակը չէ, որտեղ ազգային պատվիրակությունները պետք է միմյանց հետ բանավիճեն: Այնուամենայնիվ, չեմ կարող անպատասխան թողնել պարոն Մամիջանյանի հնչեցրած հայտարարությունները:
Կարդացեք նաև
Հայաստանում վերջերս անցկացված խորհրդարանական ընտրությունները տեղի են ունեցել խաղաղ, կազմակերպված եւ ժողովրդավարական պայմաններում, ինչն արձանագրվել է միջազգային դիտորդական տարբեր առաքելությունների կողմից:
Հայաստանի քաղաքացիներն ազատորեն արտահայտել են իրենց քաղաքական կամքը, եւ ընտրողների մեծամասնությունն ընտրել է խաղաղության, ժողովրդավարության, Թուրքիայի հետ հարաբերությունների կարգավորման, եվրոպական ինտեգրման խորացման եւ մեր ժողովրդավարական ինստիտուտների շարունակական ամրապնդման ուղին:
Ընդդիմության պահանջով երեք ընտրատեղամասերում քվեարկության արդյունքներն անվավեր են ճանաչվել, եւ ներկայումս այդ հարցի վերաբերյալ քննություն է ընթանում Հայաստանի Հանրապետության Սահմանադրական դատարանում:
Վստահ եմ, որ ժողովրդավարական Հայաստանում պետական ինստիտուտները գործում են ազատ, անկախ եւ օրենքի ու ժողովրդավարության սկզբունքներին համապատասխան: Կցանկանայի նաեւ հիշեցնել, որ 2018 թվականի հեղափոխության հիմնական պատճառներից մեկն այն էր, որ, ի թիվս այլոց, պարոն Մամիջանյանի քաղաքական ուժը չէր ապահովում ազատ եւ արդար ընտրությունների անցկացումը: Այսօր, ըստ Միջազգային հանրապետական ինստիտուտի (IRI) հարցումների, Հայաստանի քաղաքացիները վստահ են, որ իրենց ձայնը նշանակություն ունի եւ հենց իրենք են երկրի իշխանության իրական կրողները:
Պարոն Մամիջանյանը կոչ է անում չանդրադառնալ ձերբակալությունների մանրամասներին: Սակայն ես հակառակը՝ կոչ եմ անում խոսել այդ մասին: Ձերբակալված անձանցից շատերը կալանավորվել են քաղաքացիներին կաշառելու փորձերի համար:
Հայաստանի իրավապահ մարմինները բացահայտել եւ կանխել են ընտրողներին կաշառելու բազմաթիվ փորձեր: Այս գործողությունները կապված են ռուս օլիգարխի կուսակցության, բելառուսական կապեր ունեցող օլիգարխի եւ Մամիջանյանի նախկին քաղաքական թիմի անձանց հետ: Ուստի եկեք անդրադառնանք մանրամասներին:
Ընտրություններն ուղեկցվել են նաեւ զգալի արտաքին միջամտությամբ: Հայաստանը բախվել է համակարգված քաղաքական եւ տնտեսական ճնշումների, այդ թվում՝ զգալի ֆինանսավորմամբ իրականացվող փորձերի՝ ազդելու հանրային կարծիքի վրա, ինչպես նաեւ հայկական որոշ արտահանման ապրանքների նկատմամբ կիրառված սահմանափակումների: Այս ամենը վկայում է, որ մեր ժողովրդավարական գործընթացների վրա ազդելու փորձերը չեն սահմանափակվել միայն քաղաքական ոլորտով, այլ տարածվել են նաեւ տնտեսական ոլորտ:
Մեր ուղերձը նախընտրական ամբողջ ընթացքում շատ հստակ էր. Հայաստանի քաղաքացիները պետք է գնային ընտրության եւ որոշեին, թե ով է ձեւավորելու հաջորդ կառավարությունը: Ուրախ եմ, որ Հայաստանի քաղաքացիները հստակ արտահայտեցին իրենց քաղաքական կամքը՝ հօգուտ եվրոպական ինտեգրման հետագա խորացման, ինչպես նաեւ իրենց վճռականությունը՝ կառուցելու անվտանգ, ժողովրդավարական Հայաստան, որն ապրում է խաղաղ եւ հարեւանների հետ բարիդրացիական հարաբերությունների պայմաններում»,- նշել է պատգամավորը:
