«Դուք երբևէ մտածե՞լ եք հրաժարական տալու մասին, և ի՞նչ հարաբերություններ ունեք ձեր նախկին գործընկերների հետ». այսօր Կենտրոնական ընտրական հանձնաժողովի (ԿԸՀ) նախագահ Վահագն Հովակիմյանից հետաքրքրվեց լրագրողներից մեկը՝ շեշտելով նրա քաղաքական անցյալը՝ ՔՊ հիմնադիր անդամ, որը մանդատը վայր դնելով ու կուսակցությունից դուրս գալով ստանձնեց ԿԸՀ նախագահի պաշտոնը։
ԿԸՀ նախագահը հարցի պատասխանը սկսեց ձևակերպել՝ շատ հեռվից գալով, հիշելով իր անցած ուղին։ Մասնավորապես, որ 1996-ին բանակից է վերադարձել, ընդունվել համալսարան ու սկսել այն ժամանակ որպես նախագահի թեկնածու Վազգեն Մանուկյանի աջակից։
«Կան մարդիկ, որոնց հետ այդ ժամանակ ընկերներ ենք եղել, հիմա իմ հասցեին թույլ են տալիս վիրավորական որակումներ տալ, քավ լիցի»,- ասաց Հովակիմյանը։
«ԿԸՀ նախագահի պաշտոնին հավակնելով ու ընտրվելով՝ առավել քան հարազատ եմ մնացել այն գաղափարներին, որոնք ունեցել եմ մինչև քաղաքական գործունեություն ծավալելս ու ծավալելու ընթացքում։ Իմ ամբողջ գործունեությունը նվիրված է եղել նրան, որ նպաստեմ, որպեսզի Հայաստանում ընտրություններն անցնեն ազատ, արդար, թափանցիկ»,- ասաց Հովակիմյանը։
Կարդացեք նաև
Վերադառնալով բուն հարցին՝ Հովակիմյանն ասաց, որ ՔՊ-ում կան մարդիկ, որոնց հետ տարիների ընկերություն են ունեցել, և որքանով թույլ է տալիս ժամանակն ու զբաղվածությունը, փորձում են պահպանել այն։ Հովակիմյանն ասաց նաև՝ վերջին վեց ամսվա ընթացքում չի կարողացել շփվել իր պաշտոնյա ընկերների հետ։
Իսկ վարչապետ Նիկոլ Փաշինյանին ավելի քան մեկ տարի կլինի, որ չի հանդիպել։
Հրաժարական տալու առնչությամբ ասաց, որ չի մտածում դրա մասին. «Եթե ես երբևէ համարեմ, որ թերացել եմ, եթե տեսնեմ, որ մեծ վնաս եմ տվել ՀՀ-ին, կարող է մտածեմ հրաժարականի մասին»։
Արփինե ՍԻՄՈՆՅԱՆ
