ՌԴ-ում Ադրբեջանի դեսպանատունը հայտարարություն է տարածել՝ դեսպանատան հյուրատան առջև «տեղի ունեցած սադրանքի կապակցությամբ»:
«Վճռականորեն դատապարտում ենք օգոստոսի 27-ին՝ կեսօրին մոտ, Ռուսաստանի Դաշնությունում Ադրբեջանի Հանրապետության դեսպանատան հյուրատան տարածքում անհայտ անձանց կողմից մեր երկրի դեմ ուղղված սադրիչ պատկերների տեղադրումը։
Բացի նրանից, որ այս անընդունելի սադրանքը ծառայում է ադրբեջանա-ռուսական հարաբերությունների արհեստական սրմանը, չի կարելի բացառել նաև, որ այն Ադրբեջանի դեմ վերջին շրջանում մի շարք ռուսական լրատվամիջոցների կողմից իրականացվող կեղտոտ և կողմնակալ արշավի մի մասն է։
Ադրբեջանական կողմը Ռուսաստանի Դաշնության համապատասխան մարմիններին կոչ է անում պատշաճ իրավական գնահատական տալ նման սադրիչ գործողություններին, ապահովել միջադեպի համակողմանի քննությունը և անհրաժեշտ միջոցներ ձեռնարկել նման դեպքերի կրկնությունը կանխելու համար։
Կարդացեք նաև
Ռուսական կողմից ակնկալում ենք 1961 թվականի դիվանագիտական հարաբերությունների մասին Վիեննայի կոնվենցիային համապատասխան իր պարտավորությունների լիարժեք կատարում՝ Ադրբեջանի Հանրապետության դեսպանատան և նրա աշխատակիցների անվտանգության պատշաճ մակարդակի ապահովման, ինչպես նաև ցանկացած սադրիչ գործողության կանխման ուղղությամբ, որը կարող է խոչընդոտել դիվանագիտական ներկայացուցչության բնականոն գործունեությունը», – նշված է հաղորդագրությունում։
