Ստուգումներ անցկացնելու կապակցությամբ ԱԺ-ում տեղի ունեցած լսումների ժամանակ պատգամավոր Հովհաննես Դուրգարյանը հայտարարեց, թե գիտե պատգամավորի, որը ճնշումների է ենթարկվում սեփական հայացքների համար։ Պատգամավորը տվեց իր անունը եւ ասաց, որ կոնյակի գործարանի սեփականաշնորհման հարցով տեղի ունեցած քվեարկությունից հետո չի եղել մի օր, որ իր գլխավորած հիմնարկությունում ստուգումներ չանցկացվեն։
ՍՏՎԵՐԱՅԻՆ ՎԱՐՉԱՊԵ՞Տ
Ըստ որոշ աղբյուրների, Լեոնարդ Պետրոսյանը պաշտպանության նախարարությունից նորից կարող է վերադառնալ կառավարություն։ Արմեն Դարբինյանն ի պաշտոնե շարունակելու է նստել վարչապետի աթոռին, իսկ այդ աթոռին նստողին վերապահված գործառույթները, վերադարձի դեպքում, իրականացնելու է Լեոնարդ Պետրոսյանը։
ԺԱՄԱՆԱԿ ՉԻ ՈՒՆԵՑԵԼ
Կարդացեք նաև
«Առավոտը» խնդրեց Լեւոն Տեր-Պետրոսյանի գրասենյակի ղեկավար Ավետիս Ավագյանին մեկնաբանել Վանո Սիրադեղյանի հայտարարությունները նախկին նախագահի վերաբերյալ։ Սակայն պրն Ավագյանը պատասխանեց, որ դեռեւս չեն հասցրել ծանոթանալ եւ անդրադառնալ այդ ելույթին։
ԶՈՐԻԻ «ԱՐՄԵՆԻԱՆ»
Հայկական հեռուստաեթերը հետեւողականորեն ավետում է, որ «Արմենիա» հեռուստաընկերությունը հունվարի 13-ից լիարժեք գործունեություն է ծավալելու։ Տեղյակ աղբյուրները վկայում են, որ «Արմենիա» հեռուստաընկերության թիկունքին կանգնած ազդեցիկ դեմքերից մեկը հրապարակախոս Զորի Բալայանն է։
