Ի տարբերություն 5% ձայն չհավաքած բազմազան այլ կուսակցությունների՝ Հայաստանի «Սոցիալիստական ուժերի եւ մտավորականների միություն» դաշինքը ընտրություններից հետո ամենեւին էլ վհատված չէ։ Հիշեցնենք, որ ԿԸՀ-ի նախնական տվյալներով՝ այս դաշինքը հավաքել էր 2284 ձայն։ Սոցուժերի նախընտրական շտաբի քարոզարշավի պատասխանատու Հրայր Մարգարյանից փորձեցինք ճշտել, թե ի՞նչ դեր էր վերապահված Սոցուժերին այս ընտրություններում։ «Առաջին նպատակը մեր ուժերի ներկայացումն էր հասարակությանը։ Ընտրությունները դրա համար հարմար առիթ էին։ Ունեինք որոշ ակնկալիքներ, որոնք չարդարացվեցին»։ Պրն Մարգարյանը Ընտրական օրենսգիրքը համարեց «արատավոր եւ անորակ»։ Որպես ապացույց՝ բերվեց ստորագրահավաքի, հանձնաժողովների ձեւավորման, ընտրացուցակներում ահավոր անճշտությունների, նախընտրական հիմնադրամի վերահսկման եւ այլ հարցեր։ Ի դեպ, դաշինքը նախընտրական քարոզչության նպատակներով ծախսել է մոտ 6000 դոլար։
Ճիշտ է, իշխանությունների եւ կուսակցությունների միջեւ գերիշխում էին առեւտրային հարաբերությունները՝ թանկ գնով վաճառվում էին հանձնաժողովներում տեղերը, վաճառվում էր ազդեցությունը։ Ի վերջո, «ժողովուրդն էլ վաճառեց այն, ինչ ուներ՝ իր ձայնը»։ Այս ընտրությունները եւս 4 տարի երկրում կստեղծեն քաղաքական անառողջ վիճակ։
Սոցուժերը հետընտրական որեւէ ծայրահեղ քայլը համարում են անընդունելի։ «Հիմնական քայլերը, որ մենք պետք է ձեռնարկենք, հասարակության մեջ առճակատում չառաջացնելն է»։
Լ. Ա.
