Հանրապետության նախագահը հեռուստալրագրողների հետ վերջին հանդիպման ժամանակ հայտարարեց, թե ամենաշատ խախտումները Կենտրոն համայնքում են եղել։ Մինչդեռ «Կենտրոն» թաղապետարանից ստացած տվյալներով 100 հազար ընտրողների պարագայում այստեղ ցուցակային շուրջ 1500 անճշտություն է եղել։ Եվ ընդամենը 220-ն են դիմել դատարան։ Ի դեպ, սա նաեւ հետաքրքիր է այն իմաստով, որ փաստորեն 7-8-ից մեկն է իրոք նախանձախնդիր եղել իր ընտրական իրավունքը վերականգնելու մեջ։
Ո՞ՒՄ ՀԵՏ ԷՐ ԽՈՐՀՐԴԱԿՑԵԼ ԴԱՏԱՎՈՐԸ
Աշոտ Բլեյանի խափանման միջոցը փոխելու վերաբերյալ Վերաքննիչ դատարանում հունիսի 7-ի նիստի ժամանակ առանց որեւէ պատճառաբանության՝ 12-16-ը ընդմիջում էին հայտարարել։ Մինչդեռ նյութերին ծանոթանալու համար մի 15 րոպեն էլ կբավականացներ։ Ժամը 16-ին վերսկսելուց հետո դատական նիստն ընդամենը կես ժամ տեւեց։ Աշոտ Բլեյանի մերձավորները հետո պարզել էին, որ այդ 4 ժամվա մեջ դատավորը ճշտել էր, թե ինչ դատավճիռ պիտի կայացնի։
Կարդացեք նաև
ԿՊՊԶԵՆՔ ՄԻԱՍԻՆ
Լրագրողներից մեկն Արշակ Սադոյանին տեսնելով հետաքրքրվեց, թե ո՞նց է իրեն զգալու Արշակը Խուճուճ Էդոյի, Ճոյտի եւ մյուսների հետ խորհրդարանի չորս պատերի արանքում։ Արշակ Սադոյանը սուպեր-ժամանակակից պատասխան ուներ. «Ինչ ա եղել ո՞ր, միասին կպպզենք»։
ԶՈՒԼՈ՞ՒՄ ՀԱԿՈԲ
Ըստ «Առավոտին» հասած հավաստի տեղեկությունների, ԱԺ պատգամավոր ընտրված թաղային հեղինակություն Հակոբ Հակոբյանը (Լեդի Հակոբը) ձեռք է բերել նոր շուն, որի անունը Զուլում է։ Հիշեցնենք, որ պրն Հակոբյանի ներկայիս մականունը սերում է իր նախորդ շան անունից։
