Այսպես էր անվանել Մուշեղ Մովսիսյանը Կարեն Դեմիրճյանին
Մուշեղ Մովսիսյանը խորհրդարանի իր ելույթում մի քանի անգամ պնդեց, թե իրեն մտերիմ պատգամավորները Էդմունդ Ծատուրյանը, Ռոբերտ Ամիրխանյանը, Աղասի Արշակյանը, Գագիկ Կոստանդյանը եւ Գուրգեն Եղիազարյանն են, որոնց հետ կիսել է իր խոհերը, եղբոր ճակատագրի շուրջ անհանգստությունը եւ նրանցից խորհուրդներ հարցրել։
Այս առնչությամբ մեր զրույցի ընթացքում Գուրգեն Եղիազարյանը մի հետաքրքրական մանրամասն պատմեց. «Նա մոտեցել էր ինձ եւ Էդմունդ Ծատուրյանին եւ խնդրել, որ Դեմիրճյանին հանդիպի եղբոր հարցով։ Ինչքան գիտեմ, գնացել էր, եկավ եւ ասաց. «Ես նման սուրբ մարդու հետ դեռ չէի զրուցել»։ Պրն Եղիազարյանից հետաքրքրվեցինք, թե արդյոք այդքան համոզիչ էին գլխավոր դատախազի ներկայացրած փաստարկները, որ որեւէ հարցական չառաջացավ եւ լրացուցիչ պարզաբանումների կարիք չզգացվեց. «Ճիշտն ասած, վրդովված էինք կատարվածով եւ համոզված, որ ոչ մեկը չպիտի խանգարի նախաքննությանը։ Ես մտածեցի, որ եթե դեմ քվեարկեմ՝ կխանգարեմ քննությանը, որի բարոյական իրավունքը չունեմ։ Կարծում եմ, պատգամավորները պիտի հենվեն նախաքննության արդյունքների վրա, այլ ոչ թե սեփական ենթադրությունների»։
Ա. Ի.
