Թաիլանդում գլոբալիզացիայի խնդիրների մասին իմաստուն խոսակցությունների անջնջելի տպավորության տակ գտնվող ԱԺ նախագահը, ըստ ամենայնի, որոշեց, որ իր նման խորը գիտելիքների տեր մարդուն պետք է պահել բյուրեղապակյա արկղում: Ուստի նրա քաջարի թիկնազորը խիզախ հարձակում գործեց իր մեքենայի հետեւից բավականին հեռու տարածության վրա ընթացող մեկ այլ մեքենայի վրա, որում հիմնականում նստած էին օդակայանից քաղաք վերադարձող լրագրողները:
ՀՅԴ Ընդհանուր ժողովը
Ծաղկաձորում խիստ ինքնաքննադատությամբ զբաղվող դաշնակցականները պատժեցին եւ չվերընտրեցին Բյուրոյի նախկին անդամներին, որոնք համարձակվել էին չբոյկոտել «Հայաստան» համահայկական հիմնադրամի աշխատանքները, որի արդյունքում, մասնավորապես, կառուցվել էր Գորիս-Ստեփանակերտ ճանապարհը: «Օպորտունիստները» դեռ լավ են պրծել՝ նման ապազգային գործերից հետո կարող էին ընդհանրապես մնալ սառեցված անդամությամբ:
Կարդացեք նաև
Գառնիկ Անանյանը
Կոմունիստական պրերիաներից ժամանակակից կյանքում պատահականորեն հայտնված ԵՊՀ ժուռնալիստիկայի ֆակուլտետի դեկանը գույներ չխնայեց Հայաստանի, իր խոսքերով, «չարաբաստիկ» անկախությունը փնովելու համար, ինչպես նաեւ «Պրավդայի» ոճով դատափետեց «ռեւանշիստ» լրագրողներին ու փառաբանեց գործող նախագահին: Լրագրողների մատաղ սերնդի դաստիարակության սուրբ գործը հուսալի ձեռքերում է: Բա՛րձր պահենք սապոնարտադրության ալ դրոշը ժուռնալիստիկայի ֆակուլտետում: Ուռա՛:
ԱՐԱՄ ԱԲՐԱՀԱՄՅԱՆ
