Չնայած հայտնի չէ՝ արդյոք իրադարձությունների նման զարգացման դեպքում Տիգրան Նաղդալյանի հրաժարականը կընդունվի՞, այնուամենայնիվ, Ազգային հեռուստատեսության գործադիր տնօրենի պաշտոնի մի քանի թեկնածություններ են շրջանառվում։ Որպես հավանական թեկնածուներ են նշվում Սեյրան Շահսուվարյանն ու Էդվարդ Միլիտոնյանը, Հակոբ Ռուբինյանն ու, որ «Առավոտի» համար առավել ուրախալի է՝ Տիգրան Պասկեւիչյանը։
ՊԱՏՄԱԿԱՆ ՀԱՆԴԻՊՈՒՄ
Մարտի 14-ին դատավարության ընթացքում դեմ առ դեմ հանդիպել են Աղվան Հովսեփյանն ու Վանո Սիրադեղյանը։ Առաջինը ժպտալով ձեռք է մեկնել Աղվան Հովսեփյանը եւ հետաքրքրվել Վանո Սիրադեղյանի որպիսությամբ։ Վերջինս տեղեկացրել է, որ հիվանդ է եւ խնդրել է դատական նիստն արագ ավարտել։ Ինչը, ի դեպ, եւ եղել է։
Կարդացեք նաև
ՌՈՒԲԵՆ ԳԵՎՈՐԳՅԱՆԸ ԿԱՊ ՉՈՒՆԻ
«Առավոտի» երեկվա համարում տպագրվել էր տեղեկություն, որ «Պապլավոկի» կողքին, նախկին արտաքնոցի տեղում վեր է հառնել «Բինգո» եւ, որ, իրազեկ աղբյուրների վկայությամբ, այդ խաղատան տերը ԱԺ պատգամավոր Ռուբեն Գեւորգյանն է։ Այս կապակցությամբ խմբագրություն եկավ «Կամեա» ՍՊԸ-ի հիմնադիրներից մեկը՝ Արսեն Հովակիմյանը՝ փաստաթղթերով։ Պարզվեց, որ վերոնշյալ հաստատությունը որեւէ կապ Ռուբեն Գեւորգյանի հետ չուներ։ Պրն Հովակիմյանի ներկայացրած փաստաթղթում նշված էր. «Ավ. Իսահակյան փողոցում գտնվող հասարակական զուգարանի սպասարկումը «Կամեա» փոքր ձեռնարկությանը հանձնելու մասին» (94 թ. 24.02)։ 95-ին հասարակական զուգարանը սեփականացվել է։
ԳՈՒԲԵՐՆԱՏՈՐԻ ՄՈՏ ՎՌԱԶ ԳՈՐԾ ՈՒՆԻ
Երեկ չեչեն տեռորիստ Սալման Ռադուեւն իր համար փաստաբան է ընտրել։ Ափսոսանքով նկատեցինք, որ այդ փաստաբանը ամենեւին էլ Տիգրան Ջանոյանը չէր։ Հավանաբար, հաշվի էր առնված փաստաբանի գերզբաղվածությունը։
