Որքան հայտնի է առաջադեմ մարդկությանը՝ հանգուցյալին անձամբ հետմահու որեւէ փաստաթուղթ չի տրվում։ Նախ՝ նա, մեղմ ասած, անտարբեր է փաստաթղթի հանդեպ, երկրորդ՝ ոչ մեկի մտքով չի անցնի նրանից տեղեկանք պահանջել։ Սակայն պարզվում է, որ այս փաստը կասկածի տակ են առել Արագածոտնի մարզի Լեռնարոտի գյուղխորհրդում։ Խնդրեմ, համոզվեք ինքներդ. (Տեղեկանք. Տրվում է Նուբար Նշանի Տրդատյանին առ այն, որ ինքը մահացել է 1996թ. հունվարի 16-ին եւ թաղվել Արագածոտնի մարզի Լեռնարոտ գյուղում։ Տրվում է ներկայացնել պահանջվող վայրը)։ Ստորագրել է Լեռնարոտի «գ-պ»-ն (հավանաբար՝ գյուղապետը)՝ Ա.Սահակյանը։
Տեղեկանքը «երկրորդ թարմության» է՝ տրված է 99թ. ապրիլի 17-ին։ Չխոսելով տեղեկանքի անախրոնիզմի մասին (տեղեկանքը պրն Տրդատյանին տրվել է մահվանից 3 տարի անց եւ ոչ, ասենք, անմիջապես), պարզապես հետաքրքիր է, թե հանգուցյալը ո՞ւմ պետք է ներկայացնի տեղեկանքը (գյուղապետը դա ձեւակերպել է որպես «պահանջվող վայր»)։ Ենթադրում ենք՝ կա՛մ Գաբրիել հրեշտակապետին, կա՛մ Հադեսի թագավորության մի որեւէ հայ չինովնիկի, որը թույլ կտա պրն Տրդատյանին՝ որպես ՀՀ լիիրավ հանգուցյալ, լիարժեքորեն մասնակցել առաջիկա հնարավոր ընտրություններին։
ԼԻԼԻԹ ԱՎԱԳՅԱՆ
