ՈՒԿՐԱԻՆԱ-ՀԱՅԱՍՏԱՆ ԽԱՂՆ ԱՆՑԿԱՑՎԵԼՈՒ Է ԼՎՈՎՈՒՄ Վերջին օրերին Ուկրաինայի զանգվածային լրատվամիջոցներում այն կարծիքն էր հրապարակվել, թե Ուկրաինայի ազգային հավաքականի գլխավոր մարզիչ Վալերի Լոբանովսկին դիմել է երկրի Ֆուտբոլի ֆեդերացիայի ղեկավարությանը՝ խնդրանքով, որ աշխարհի 2002 թվականի առաջնության ընտրական մրցաշարի սեպտեմբերի 5-ին նշանակված Ուկրաինա-Հայաստան հանդիպումը չանցկացվի Լվովում, այլ ավանդույթի համաձայն հավաքականները մրցեն Կիեւում։ Այս առիթով պաշտոնական հայտարարությամբ հանդես է եկել ֆեդերացիայի մամուլի ծառայությունը եւ ամբողջովին հերքել է այդ լուրը։ Հայտարարությունում, մասնավորապես, ասվում է, որ համաձայն Ուկրաինայի ՖՖ նախագահ Գրիգորի Սուրկիսի եւ Լվովի մարզային պետական վարչակազմի ղեկավարության միջեւ նախապես ձեռք բերված պայմանավորվածության, Ուկրաինայի եւ Հայաստանի ազգային հավաքականների միջեւ հանդիպումը կայանալու է Լվովի «Ուկրաինա» ստադիոնում, իսկ երիտասարդական հավաքականները մեկ օր առաջ խաղալու են Չերվոնոգրադում։