ՎԵՐՋԱՊԵՍ «ԳԼԱԶՈԿԻՑ» ՆԱՅԵՑԻՆ Նախնական պայմանավորվածությունների համաձայն՝ երեկ «Հոկտեմբերի 27»-ի գործով խորհրդարանական հանձնաժողովի անդամներն այցելեցին ՆԳՆ եւ ԱԱՆ մեկուսարաններ։ Հանձնաժողովի անդամ Ղուկաս Ուլիխանյանն այցը բնորոշեց որպես «ընդհանուր ճանաչողական բնույթի»։ Թեեւ նա նախապես նշել էր, որ «Հոկտեմբերի 27»-ի գործով ամբաստանյալներին այցելելու մտադրություն առայժմ չունեն, այնուամենայնիվ, ինչպես պարզվեց ավելի ուշ, նրանք դիտանցքից հետեւել էին Կարեն Հունանյանին։ Վերջինս այդ պահին նստած ինչ-որ բան է գրելիս եղել։ Չի երեւացել, թե նրան ինչ-որ մեկը թելադրո՞ւմ է այդ նոթերը։ Այնպես որ, առայժմ արտադատարանական աջակցության կասկածները հիմնավորող փաստեր չեն հայտնաբերվել։ Բայց հանձնաժողովը նախատեսում է նաեւ անակնկալ այցեր, այնպես որ՝ դեռ հույս կա, որ դիտանցքից մի բան կտեսնեն։ Հանձնաժողովի այսօր կայանալիք նիստում ամփոփվելու են այս ճանաչողական այցի արդյունքները, նաեւ քննարկվելու է փորձագետների ընտրության հարցը։ «Կարծում եմ, սկսվեց հանձնաժողովի գործնական աշխատանքների փուլը։ Այս այցից հետո արդեն յուրաքանչյուրս երեւի թե իր համար պիտի աշխատանքային որոշակի ծրագիր մշակի»,- ասաց պրն Ուլիխանյանը, որը հանձնաժողովի նիստերից մեկում մտահոգություն էր հայտնել, թե քանի որ ԱԺ-ի որոշմամբ նախատեսվում է, որ իրենք երկու ամիսը մեկ պիտի հաղորդում ներկայացնեն կատարված աշխատանքների վերաբերյալ՝ նման տեմպով շարունակելու պայմաններում իրենք հաղորդելու բան չեն ունենա։ Մեկ ամիս է, ինչ ստեղծվել է այս հանձնաժողովը եւ անցած ժամանակաշրջանում թերեւս մասամբ փարատվեցին այն նախնական կասկածները, թե հանձնաժողովը գործունեության մեխանիզմներ չի ունենա։ Թեեւ քաղաքացիներից տեղեկություններ հայցելու վերջին նախաձեռնությանը, ինչպես հայտնեց Ղուկաս Ուլիխանյանը, դեռեւս արձագանքողներ չկան, իրենց ոչ ոք չի դիմել. «Դեռ նոր է մեր հայտարարությունը։ Ակնկալում ենք, որ արձագանքներ կլինեն»։ Ա. Ի.
