Վահե
Շահվերդյանը չի կարողանում համակերպվել Վարդան Աճեմյանի ապրած տան պատին փակցված
անշուք ու խղճուկ հուշաքարի հետ: Երեկ Գ. Սունդուկյանի անվան ազգային ակադեմիական
թատրոնի գեղարվեստական ղեկավար ու գլխավոր ռեժիսորի հրավիրած ասուլիսի առանցքում
թատրոնի 83-84-րդ թատերաշրջանն էր՝ նվիրված Վ. Աճեմյանի 100-ամյակին: Թատերաշրջանը
կբացվի սեպտեմբերի 10-ին՝ Ա. Պետրոսյանի «Ես մի ծառ եմ ծիրանի» ներկայացումով: Ռեժիսորը
հանգամանորեն խոսեց թատերաշրջանի ընթացքում կայանալիք ներկայացումների, հոբելյանական
երեկոների մասին: «Առավոտի» ռեպլիկին՝ «Կոնկրետ մայր թատրոնում ե՞րբ «կհնչի» Աճեմյան»,
պարոն Շահվերդյանը պատասխանեց, որ այն ծրագրված է սկսել նոյեմբերից, Շիրվանզադեի
«Պատվի համար» դրամայի աճեմյանական մեկնաբանմամբ: Թե ինչո՞ւ հենց այս պիեսով, թատրոնի
գլխավոր ռեժիսորը ներկայացրեց, որ 1939թ. դեռեւս Լենինականի Ա. Մռավյանի անվան թատրոնի
գլխավոր բեմադրիչ Վ. Աճեմյանը հրավիրվել է Սունդուկյանի անվան թատրոն ու իրականացրել
այս պիեսի բեմադրությունը. «Սա մեծ բեմադրիչի գլուխգործոցներից է»: Մեր հետաքրքրությանը,
թե ավելի ճիշտ չէ՞ր թատերաշրջանը բացել «Պատվի համարով» կամ հայ դասական դրամատուրգի
այլ գործով, Վ. Շահվերդյանը բարձրաձայնեց. «Մեր հայ դասական դրամատուրգիան այնքան
էլ հարուստ չէ: Թատրոնի գեղխորհուրդը որոշել է հենց այս ներկայացմանը մոտենալ եւ,
կարծում եմ, կարելի է պատկերացնել, թե ինչ բարդ է, եթե չասեմ՝ ռիսկ, աճեմյանական
բեմադրությունից հետո հանձն առնել իրականացնել բեմադրության երկրորդ ծնունդը թատրոնում»:
Մեր հաջորդ հետաքրքրությանը, թե իրենց՝ սունդուկյանցիներին ինչո՞վ է աջակցում
մշակույթի նախարարությունը պարոն Շահվերդյանը նախ վրդովված հայտնեց, որ դեռեւս 1995թ.
Երեւանի քաղաքապետարանի որոշմամբ, Անդրֆեդերացիայի փողոցը վերանվանվել է Վ. Աճեմյանի
անունով, բայց մինչ օրս էլ այդ փողոցում չես հանդիպի փոփոխված ցուցանակի. «Չեմ կարծում,
որ այդ անհրապույր փողոցը պետք է կոչվեր մեծ բեմադրիչի անունով: Այսօր զարգացնում
են զբոսաշրջությունը, հյուրեր են գալիս եւ արտերկրում եթե խոսք է գնում հայ թատրոնի
մասին, բոլորը միաբերան տալիս են Վարդան Աճեմյանի անունը: Չեմ ասում, թե հրապարակին
հարող որեւէ փողոց, բայց կարելի էր քաղաքի ավելի կենտրոնական ու բարեկարգ փողոց կոչել
բեմադրիչի անունով»: Պարոն Շահվերդյանը նաեւ նկատեց, որ բոլոր հոբելյանների ու հոբելյարների
համար մեր կառավարությունը մի ստերեոտիպ է մշակել. տրամադրվում է 1.200.000 դրամ.
«Ընդառաջելով թատրոնի գեղարվեստական խորհրդի որոշմանը, վարչապետ Անդրանիկ Մարգարյանը
աջակցեց հրատարակելու աճեմյանագետ Իդա Բաբայանի երկու աշխատությունները»: Ս.
ԴԱՆԻԵԼՅԱՆ
