Միավորված աշխատանքային կուսակցությունն ունենալու է ամենաբանաստեղծական կարգախոսները. երեկ «Փաստարկ» ակումբում կուսակցության ղեկավար Գուրգեն Արսենյանն ասաց, թե ՄԱԿ-ը Պարույր Սեւակի տողերն է օգտագործել իբրեւ կարգախոս: Թե հատկապես որոնք՝ նախընտրեց չբացահայտել մինչեւ պաշտոնական քարոզարշավի մեկնարկը:
Նախընտրական իրավիճակը ՄԱԿ-ի ղեկավարը գնահատեց բավարար, «քաղաքական տիրույթում գտնվող»: Մինչդեռ ավելի վաղ պրն Արսենյանը հայտարարել էր, թե 2007-ի ընտրությունների նախօրեին չկա քաղաքական կոնֆլիկտ, գաղափարախոսությունների բախում. «Նախընտրական ողջ գործընթացում կա մի քիչ ոչ քաղաքական երեւույթ՝ բոլորը խոսում են մարդկանցից. ընդդիմությունը խոսում է Քոչարյանից, ՀՀԿ-ն խոսում է Ծառուկյանից, ԲՀԿ-ն՝ Սերժ Սարգսյանից, մեծամասնականը՝ ՀՀԿ-ից»: Երեկ «Առավոտի» հարցին, թե հակասություն չկա՞ իր այս 2 գնահատականների միջեւ՝ ՄԱԿ-ի ղեկավարը պատասխանեց «Գործընթացները քաղաքական տիրույթում են՝ առանց քաղաքական բանավեճի: Չկա՛ ոչ մի հակասություն»:
«Լրագրի» թղթակիցը հարցրեց՝ կարելի՞ է բավարար գնահատել նախընտրական իրավիճակը, երբ իշխող կուսակցության ղեկավար անդամի դեմ իրականացվում է մահափորձ: «Հիմա, եթե կարկուտի հետեւանքով իշխող կուսակցության ներկայացուցչի ինչ-որ բան տուժում է, դա քաղաքակա՞ն կուսակցությունների գործն է»,- ի պատասխան հարցրեց Գուրգեն Արսենյանը: «Մահափորձը բնական աղե՞տ եք համարում» հավելյալ հարցին էլ այսպես արձագանքեց. «Պիտի քաղաքական գնահատական տանք մի երեւույթի, որին իրավապահները դեռ չե՞ն տվել գնահատական: Բնական է, որ դատապարտում ենք ցանկացած մարդու կյանքի դեմ ոտնձգություն՝ լինի իշխող կամ ոչ իշխող կուսակցության անդամ, թե ապաքաղաքական քաղաքացի: Բայց քաղաքական գնահատական տալը, քանի որ իշխող կուսակցության անդամ է՝ կներեք, դրանից շատ հեռու ենք»: Նաեւ խոստացավ, թե ՀՀԿ խորհրդի անդամ Վարդան Ղուկասյանի դեմ մահափորձին քաղաքական գնահատական կտան՝ «եթե հետաքննության ընթացքում պարզվի, որ ունեցել է քաղաքական ենթատեքստ»: