«Օրինաց երկրի» նախագահ Արթուր Բաղդասարյանը եւ կուսակցական մի շարք գործիչներ ապրիլի 7-ին եւ 8-ին բազմաթիվ հանդիպումներ ունեցան Լոռիի եւ Արագածոտնի մարզերում եւ մասնավորապես՝ Վանաձոր, Սպիտակ, Ալավերդի, Աշտարակ քաղաքներում:
«Առավոտին» ՕԵԿ-ից հայտնեցին. «Չնայած մի շարք դեպքերում տեղ գտած տեղական ինքնակառավարման մարմինների եւ գործատուների ճնշումներին (մասնավորապես ՀՀԿ-ն քարոզող «Մանես-Վալեքս» ընկերության տնօրինությունը) եւ մարդկանց վախեցնելուն («եթե գնաք հանդիպման՝ աշխատանքից կազատենք») դահլիճները լեփ-լեցուն էին»:
Վանաձորի քաղաքային իշխանությունները հրաժարվել են տրամադրել երաժշտական ուսումնարանի դահլիճից առավել մեծ Շառլ Ազնավուրի անվան դահլիճը, չնայած այդ նույն դահլիճը մի քանի օր առաջ տրամադրվել էր այլ քաղաքական ուժի: Եվ ուսումնարանի 350 տեղանոց դահլիճում հարկադրված փորձել են տեղավորվել շուրջ 500 հոգի:
Չնայած նախապես քաղաքապետարան ներկայացված եւ պատշաճ ձեւակերպված դիմումին՝ Սպիտակի քաղաքապետարանը նույնպես հրաժարվել է տրամադրել մեծ դահլիճ: Տրամադրվել է երաժշտական դպրոցի փոքր դահլիճը, այն էլ՝ 100 000 դրամ վարձավճարով, ինչն, ըստ ՕԵԿ-ի՝ «չի տեղավորվում օրենքի շրջանակներում»:
Թե՛ Սպիտակում, թե՛ Վանաձորում, խախտելով «Ընտրական օրենսգրքի» պահանջները, ՕԵԿ-ի ներկայացուցիչներին տեղեր չեն տրամադրել արտաքին քաղաքական գովազդի համար, այն դեպքում, երբ ողջ մարզը հեղեղված է ՀՀԿ-ի եւ «Բարգավաճ Հայաստանի» պաստառներով:
Չնայած հարուցված արհեստական արգելքներին, ըստ «Օրինաց երկրի»՝ հանդիպումներն անցել են ջերմ եւ ոգեւորված մթնոլորտում. «Թե՛ հարցերն էին բազմաթիվ, թե՛ դիմումներն ու առաջարկությունները: Քաղաքացիները հերթական անգամ իրենց աջակցությունն արտահայտեցին ՕԵԿ-ին»:
