Կրթություն՝ բոլորի համար

 Երեկ «Կոնգրես» հյուրանոցում բացվեց «Հատուկ կրթության բարեփոխումների հեռահար նպատակները. նոր հայացք, նոր մոտեցումներ» խորագրով միջազգային խորհրդաժողովը, որը կազմակերպել էին ԿԳՆ-ն եւ «Հույսի կամուրջ» հասարակական կազմակերպությունը՝ Բաց հասարակության ինստիտուտի հիմնադրամի հայկական մասնաճյուղի  եւ ՄԱԿ-ի մանկական հիմնադրամի աջակցությամբ: Ինչպես տեղեկացնում է ԿԳՆ լրատվականը՝ խորհրդաժողովին մասնակցում էր Հունգարիայի, Չեխիայի, Սերբիայի, Լատվիայի, Լիտվայի, ինչպես նաեւ ՀՀ ավելի քան 120 մասնագետ:

Խորհրդաժողովին ողջույնի խոսքով դիմեց ԿԳ նախարար Ա. Աշոտյանը, նշելով, որ նախարարությունը հատուկ ուշադրություն է դարձնում հատուկ եւ ներառական կրթության բարեփոխումների գործընթացին. կատարվել են օրենսդրական փոփոխություններ, եւ «Հանրակրթության մասին» ՀՀ օրենքի մշակվող նախագծում եւս հատուկ եւ ներառական կրթության հատվածով նոր երաշխիքներ կան: Նախարարն ընդգծեց, որ հատուկ կրթության ոլորտում իրականացված «հեղափոխական բարեփոխումները» հնարավոր են դարձել պետական մարմինների  եւ հ/կ-ների ու քաղաքացիական հասարակության ակտիվ համագործակցության արդյունքում: Ըստ նախարարի՝ ԿԳՆ-ն հետեւողական է լինելու պետության կողմից բյուջետային ներդրումներն այսուհետ ավելի նպատակային օգտագործելու հարցում: Հատուկ կրթության ոլորտում նախարարն առանձնացրեց նաեւ միջազգային դոնոր կազմակերպությունների եւ տեղական հասարակական կազմակերպությունների աշխատանքը, որոնք մեծապես նպաստել են բարեփոխումները վերջնական եզրագծին հասցնելուն: Իսկ ԱԺ կրթության, գիտության, մշակույթի, երիտասարդության հարցերի եւ սպորտի հանձնաժողովի անդամ Ա. Բախշյանն ընդգծեց քաղաքացիական հասարակության դերը հատուկ եւ ներառական կրթության գործում՝ հասարակության մեջ հանդուրժողականության ապահովման, սոցիալական արդարության եւ այլ «երազած չափորոշիչների» կայացման գործում: Գիտաժողովի մասնակիցները շեշտեցին, որ նման միջոցառումները նպաստում են  հանրային ուշադրության սեւեռմանը հասարակության ավելի խոցելի խավերի խնդիրներին, ինչպես նաեւ հնարավորություն են տալիս հատուկ կրթության ոլորտում տարբեր երկրների փորձի փոխանակման եւ համագործակցության ընդլայնման համար: