ԱՄՆ դեմոկրատական կուսակցությունը Սենատում մեծամասնություն ստացավ՝ 60 ձայն՝ 100-ից: Ձայների վերահաշվարկի արդյունքում Մինեսոթա նահանգից Սենատի անդամ դարձավ դեմոկրատ Էլ Ֆրենկենը: Վերին պալատում ստացած ձայների մեծամասնությունը դեմոկրատներին հնարավորություն կտա անցկացնել ցանկացած օրինագիծ՝ չվախենալով հանրապետական փոքրամասնության հակազդեցությունից: Դեմոկրատական կուսակցությունը Սենատում նման հաջողության է հասել միայն 30 տարի առաջ: Սակայն այսօր դեմոկրատ սենատորների շարքերում բացակայում է միասնությունը:
Բացի այդ, Սենատի անդամներից երկուսը հաճախ են բացակայում հիվանդության պատճառով: Նոյեմբերին տեղի ունեցած ընտրությունների պաշտոնական արդյունքների համաձայն, ընդամենը 215 ձայնի առավելությամբ հաղթել էր Ֆրենկենի մրցակիցը՝ հանրապետական Նորման Քոուլմանը: Դեմոկրատները պահանջեցին ձայների վերահաշվարկ, որից հետո հաղթող ճանաչվեց Ֆրենկենը: Քոուլմանը դիմեց տարբեր դատական ատյանների, սակայն նահանգի գերագույն դատարանը չընդունեց նրա փաստարկները:
Ֆրենկենը, որը տարիներ առաջ ժողովրդականություն էր վայելում որպես կատակերգու, հանդես է գալիս նաեւ որպես բեստսելերների հեղինակ եւ ռադիոհաղորդավար: