Ազգային անվտանգության խորհրդի քարտուղար Արթուր Բաղդասարյանը հուլիսի 1-ին ընդունել է Հայաստանում Մեծ Բրիտանիայի արտակարգ եւ լիազոր դեսպան Չարլզ Լոնդսեյլին: Ինչպես հայտնում են Ազգային անվտանգության խորհրդի աշխատակազմի մամուլի ծառայությունից, զրուցակիցները քննարկել են անվտանգության արդի մարտահրավերներին առնչվող հարցեր: Չարլզ Լոնդսեյլը տեղեկացրել է, որ Մեծ Բրիտանիայում ընդունվել է Ազգային անվտանգության նոր ռազմավարություն, որը ներառում է նաեւ տնտեսական ճգնաժամին, միջազգային ահաբեկչության դեմ պայքարին եւ ժամանակակից այլ մարտահրավերների դիմագրավելու ուղիները:
Շնորհակալություն հայտնելով դեսպանին Մեծ Բրիտանիայի Ազգային անվտանգության ռազմավարության փաթեթը եւ ռազմավարության ընդունման մասին համապարփակ տեղեկատվություն տրամադրելու համար՝ Արթուր Բաղդասարյանը կարեւորել է Հայաստանի եւ Մեծ Բրիտանիայի համագործակցության սերտացումը գլոբալ անվտանգությանն սպառնացող մարտահրավերներին դիմագրավելու գործում:
