Լոռու մարզպետարանից տեղեկացանք, որ Հայաստանում Լեհաստանի փոխդեսպան Պշեմիսլավ Գրաբովսկին եւ դեսպանության զարգացման աջակցության ծրագրերի համակարգող Օլեսյա Գրաբովսկան երկօրյա աշխատանքային այցով հյուրընկալվել են Լոռիում: Ըստ հյուրերի, Լեհաստանի կառավարությունը Հարավային Կովկասի երկրներում զարգացման եւ աջակցության ամենաշատ ծրագրերը իրականացնում է հենց Հայաստանում: Լոռի այցի նպատակն էլ նման ծրագրերն են: Մարզերի զարգացմանն ուղղված հայաստանյան 9 ծրագրերից 5-ը նախատեսված է Լոռիի համար:
Ադրբեջանից բռնագաղթած հայերով բնակեցված Արջուտ գյուղը խմելու ջրի հիմնահարց ունի՝ Լեհաստանի կառավարության օժանդակությամբ նորոգվելու է գյուղի ներքին ցանցի խողովակաշարը: Հովհաննես Թումանյանի հայրենի Դսեղում մարզահրապարակ է կառուցվելու: Քարաձորում կնորոգվի բուժկետը, մարզկենտրոն Վանաձորում՝ թիվ 3 դպրոցի մարզադահլիճը: Չի բացառվում, որ Լեհաստանի աջակցությամբ նորոգվի նաեւ Վանաձորի թիվ 19 մանկապարտեզը:
