ԶԼՄ-ների ազատության հարցերով ԵԱՀԿ ներկայացուցիչ Դունյա Միյատովիչը Թուրքիայի արտգործնախարար Ահմեդ Դավութօղլուին նամակ է ուղարկել, որում իր անհանգստություններն է հայտնել Թուրքիայում կայքէջերի փակման վերաբերյալ: News.am-ի փոխանցմամբ, Դունյա Միյատովիչը կոչ է արել բարեփոխել 5651 օրինագիծը, որով ներկայիս գլոբալիզացիայի պայմաններում սահմանափակվում է քաղաքացիների տեղեկացվելու իրավունքը: Այդ համատեքստում հիշատակվել է Թուրքիայի հեռահաղորդակցության եւ կապի նախարարության կողմից արգելափակված Youtube-ի եւ Google-ի մասին: Դունյա Միյատովիչը նշել է, որ վերջին 2 տարում Թուրքիայում արգելափակվել է 5 հազարից ավելի կայք, ինչը անհանգստացնող երեւույթ է: Հիշեցնենք, որ Թուրքիայում Youtube-ի եւ Google-ի սահմանափակումների դեմ է հանդես եկել Թուրքիայի նախագահ Աբդուլա Գյուլը, ով Twitter միկրոբլոգում հայտնել է, որ հրահանգել է հիշյալ կայքերի արգելափակումը վերացնելու համար հարկ եղած դեպքում օրենսդրական փոփոխություններ կատարել:
