Ուսումնամարզական հավաքի եւ փետրվարի 9-ին Վրաստանի ընտրանու հետ ընկերական հանդիպման մեկնող ֆուտբոլի Հայաստանի ազգային հավաքականը օդանավի անսարքության պատճառով ուշացումով է Կիպրոս ժամանել:
Օդանավի անսարքության մասին լուրը կայծակի արագությամբ տարածվեց: Իրողությունը պարզելու նպատակով կապվեցինք մեր ֆուտբոլային պատվիրակության կազմում արդեն Կիպրոսում գտնվող ՀՖՖ մամուլի քարտուղար Տիգրան Իսրայելյանի հետ: Նա տեղեկացրեց, որ իրենք Կիպրոս մեկնում էին Դոնեցկից ժամանած չարտերային չվերթով: Օդում, իրոք, ինքնաթիռի անսարքություն է հայտնաբերվել եւ անձնակազմը որոշել է վերադառնալ «Զվարթնոց» օդանավակայան, որտեղ էլ անսարքությունը վերացնելուց հետո օդանավը վերստին ուղղություն է վերցրել դեպի Կիպրոս եւ, ինչպես ասում են, բարով-խերով վայրէջք կատարել: Տիգրան Իսրայելյանը փոխանցեց նաեւ, որ ամեն բան կարգին է, եւ ֆուտբոլիստները ձեռնամուխ են եղել մարզումներին: