Երեկ Նալբանդյան 106/1 հասցեում իրականացվող շինարարության դեմ բողոքի ակցիա էին անցկացնում հարակից շենքերի բնակիչները: Նրանք հատկապես դժգոհում էին, որ իրենց տարածքում ծառեր են հատվում: Մի քանի բնապահպանական հ/կ-ներ եւ քաղաքացիներ դեռ կանգուն մնացած ծառերին սպիտակ կտորներ էին կապել՝ ի նշան բողոքի եւ այն բանի, որ այդ ծառերն էլ են ենթակա հատվելու: Նշենք, որ այս տարածքի բնակիչների դժգոհությունն է հարուցել նաեւ այն, որ իրենց բակում, ցածրահարկ՝ 5-6 հարկանի շենքերի հարեւանությամբ կառուցվելու է երկու 16 հարկանի շենք, որը նրանց զրկելու է արեւի լույսից:
Հիշեցնենք, որ այստեղ քանդման աշխատանքներ է տանում «Ավագ շին» ՍՊԸ-ն, որի գործունեությունը երեկվանից ժամանակավորապես դադարեցվել է: Տարածք ժամանած քաղաքապետարանի պաշտոնյաներից մեկն էլ հայտնել է, որ այս ընկերությունը տվյալ տարածքում իրավունք ուներ միայն քանդման աշխատանքներ կատարելու եւ քանի դեռ չի ստացել շինարարությունը սկսելու իրավունք, նախատեսված շենքերը չեն կառուցվելու:
