![\"\"](\"https://www.aravot.am/2011/aravot_arm/February/25/p14.jpg\")
Այսօր կարճատեւ այցով Ֆրանսիայի նախագահ Նիկոլա Սարկոզին կայցելի Թուրքիա: Սակայն ըստ թուրքական մամուլի, այցի հետ կապված Անկարայում որոշ դժգոհություններ կան: Խոսքը վերաբերում է վերջին պահին Սարկոզիի այցի արարողակարգում տեղի ունեցած փոփոխություններին։ Ըստ այդմ՝ նախապես հայտարարված երկօրյա պաշտոնական այցի փոխարեն լինելու է ընդամենը 5-ժամանոց այց: Այդ փոփոխությունների առնչությամբ իր վրդովմունքն է հայտնել նաեւ Թուրքիայի վարչապետ Ռեջեփ Թայիփ Էրդողանը։ «Սարկոզին նախագահ ընտրվելուց ի վեր չի այցելել Թուրքիա։ Սակայն Թուրքիայի նախագահը եւ ես այցելել ենք Ֆրանսիա։ Իսկ Սարկոզին որոշեց Թուրքիա գալ ոչ թե որպես Ֆրանսիայի նախագահ, այլ՝ G20-ում նախագահող երկրի ղեկավար։ Կարծում եմ, որ Սարկոզիի՝ նման մակարդակով այցը որեւէ կերպ չի կարող նպաստել Ֆրանսիայի եւ Թուրքիայի հարաբերություններին»,- Agence France Presse գործակալությանը տված հարցազրույցում հայտարարել է Թուրքիայի վարչապետը։ Ակնկալվում էր, որ Ֆրանսիայի նախագահը կհանդիպի Թուրքիայի նախագահ Աբդուլա Գյուլի եւ վարչապետ Ռեջեփ Թայիբ Էրդողանի հետ:
