ՀՀ սպորտի եւ երիտասարդության հարցերի նախարար Արթուր Պետրոսյանը երեկ ընդունեց օլիմպիական չեմպիոն Վլադիմիր Ենգիբարյանին: Հայաստանցի բռնցքամարտիկներից մինչ օրս միայն Ենգիբարյանին է հաջողվել օլիմպիական չեմպիոն հռչակվել: Դա հեռավոր 1956 թվականին էր՝ Մելբուռնում: Կաշվե ձեռնոցի հայ վարպետն իր մարզական կենսագրության ընթացքում նաեւ Խորհրդային միության ու Եվրոպայի եռակի չեմպիոն է դարձել: 79-ամյա վետերանը 1994 թվականից բնակվում է ԱՄՆ-ում: Ողջունելով լեգենդար մարզիկին՝ նախարար Արթուր Պետրոսյանն ընդգծեց, որ ողջ հայ ազգը հպարտանում է անվանի մարզիկով եւ մշտապես հիշում նրա օլիմպիական հաղթանակը: Իր հերթին Վլադիմիր Ենգիբարյանը նշեց, որ ուրախ է գտնվել հայրենիքում, հանդիպել մարզական ղեկավարության հետ:
Արթուր Պետրոսյանը Հայաստանում ֆիզիկական կուլտուրայի եւ սպորտի զարգացման գործում ունեցած մեծ ավանդի համար լեգենդար բռնցքամարտիկին պարգեւատրեց ՀՀ սպորտի եւ երիտասարդության հարցերի նախարարության ոսկե մեդալով: Իսկ նախօրեին Վլ. Ենգիբարյանը Գագիկ Ծառուկյանից ստացել էր ՀԱՕԿ-ի բարձրագույն պարգեւը՝ «Ոսկե շքանշանը»:
