Կադրային փոփոխությունները Ռոբերտ Քոչարյանի հետ կապ չունեն

Վերջին շրջանում իշխանական վերնախավում տեղի ունեցող կադրային փոփոխությունները Կովկասի ինստիտուտի տնօրեն, քաղաքագետ Ալեքսանդր Իսկանդարյանի ասելով՝ ոչ մի կերպ չեն կարող պայմանավորված լինել Ռոբերտ Քոչարյանի՝ քաղաքականություն վերադառնալու հնարավորությամբ: Դրանք, քաղաքագետի մատուցմամբ, միտված են քաղաքականության եւ տնտեսության տարանջատմանը եւ օբյեկտիվ բնույթ են կրում: Իսկ դա ընկալելի՞ է արդյոք հասարակության համար: «Ոչ, չեմ կարծում: Բանն այն է, որ Հայաստանում հասարակական կարծիքը կախված է ոչ թե նրանից, թե ինչ է կատարվում իրականում, այլ՝ թե դա հասարակությանն ինչպես է մատուցվում, եւ ինչ է հասարակությունն ուզում լսել: Իսկ հասարակությունը, ոչ միայն Հայաստանում, ուզում է միայն «սեւ ու սպիտակ» բաներ լսել, ուզում է, որ իրեն ասվի՝ ով է վատը, ու ով՝ լավը: Դա պայմանավորված է հասարակության սոցիալական ակնկալիքներով, դժգոհությամբ, ճգնաժամով, «Մարտի 1»-ով եւ դրանց հետեւանքներով: Հասարակությունը դեռ չի գիտակցում, որ կարող է անմիջականորեն ազդել քաղաքականության վրա, նա քաղաքական «ճակատամարտերն» ընկալում է որպես «նրանց» պայքար. «մենք» ու «նրանք»: Հասարակության օտարումը շարունակվում է, եւ նա արդյունքում իշխանության ներսում որեւէ փոփոխություն ընկալում է որպես ինտրիգներ, «ռազբորկաներ», որոնք իր հետ առնչություն չունեն: Որպեսզի իրավիճակը փոխվի՝ էլիտայի փոփոխությունը բավարար չէ. պետք է փոխվի հասարակությունը»,- կարծիք հայտնեց Իսկանդարյանը: