Տեղեկություն էր տարածվել, որ անսպասելի ձնաբուքի եւ մերկասառույցի պատճառով փակվել է Ջաջուռի լեռնանցքը`այսպիսով անհարմար վիճակի մեջ դնելով Գյումրիից Վանաձոր ուղեւորվող տասնյակ մեքենաների վարորդներին: Սակայն, ինչպես մեզ փոխանցեց Շիրակի մարզպետարանի քաղաքաշինության վարչության տրանսպորտի եւ ճանապարհաշինության բաժնի պետ Խաչատուր Խնձրցյանը՝ ճանապարհն արդեն բացվել է, այնտեղ աշխատում է աղ ու ավազ ցանող տեխնիկա, նմանապես աղ ու ավազ են ցանում Լանջիկի ու Վարդաղբյուրի ճանապարհահատվածներում:
Մարզպետարանի պաշտոնյայի վստահեցնելով, Շիրակի մարզը լիարժեք պատրաստ է ձմռան քմահաճույքներին:
Շիրակի մարզի արտակարգ իրավիճակների վարչության պետ Սարիբեկյանն էլ տեղեկացրեց, որ ահազանգ ստանալուն պես, տեղեկացրել են Խաչատուր Խնձրցյանին , որն էլ իր հերթին անմիջապես կազմակերպել է փակ ճանապարհները մերկասառույցից ազատելու աշխատանքները: Սակայն, ըստ պարոն Սարիբեկյանի, Քեթի-Թորոս հատվածում ավտովթար է տեղի ունեցել, ու թեեւ բարեբախտաբար մարդկային զոհեր չկան, այդուհանդերձ շատ հավանական է, որ պատճառը եղել է ձնաբուքը:
Արտակարգ իրավիճակների վարչության պետի տեղեկացնելով՝ ավտովթար է տեղի ունեցել նաեւ Լանջիկի մոտակայքում, տուժածներից մեկին տեղափոխել են Գյումրու Գալուստ Գյուլբենկյանի անվան հիվանդանոց:
Նունե ԱՐԵՎՇԱՏՅԱՆ
