Ինչպես տեղեկացրել ենք, այսօր Գյումրիի այսպես կոչված «50-ամյակի» կամրջից կախվել էր Ջաջուռ գյուղի բնակիչ, 21-ամյա Ստյոպա Ավագյանը: Ջաջուռի գյուղապետ Սոկրատ Սուվարյանի տեղեկացնելով` Ավագյանների ընտանիքը թեև գրանցված է Ջաջուռում, սակայն 1988 թվականի երկրաշարժից հետո փաստացի բնակվում է Գյումրիում: Նրանք անօթևան են, քաղաք են տեղափոխվել գյուղի տան փլուզումից հետո: Ըստ Սոկրատ Սուվարյանի՝ գյուղում ինքնասպան եղած երիտասարդին նույնիսկ չեն ճանաչում, նա ծնվել ու մեծացել է Գյումրիում: Միայն գիտեն, որ բանակից վերադարձել է այս տարվա մայիսին ու գործազուրկ է:
Շիրակի մարզի քննչական բաժնից էլ aravot.am-ին տեղեկացրեցին, որ երիտասարդն ամենայն հավանականությամբ ինքնասպան է եղել` ընտանեկան մռայլ ու անելանելի իրավիճակներում հայտնվելու պատճառով: Ստյոպա Ավագյանի ծնողները բաժանվել են, երբ նա 4 տարեկան էր. թե հայրը, թե մայրը նոր ընտանիքներ են կազմել, որի մասին Ստյոպան իմացել է վերջերս: Խորթ մոր հետ բնակվելով նույն հարկի տակ` նա 21 տարի շարունակ այդ մասին չի իմացել, պատահականորեն տեղեկացել է բանակ գնալ-գալուց հետո: Իմանալով, որ հարազատ մայրը Կիրով փողոցի վրա առեւտուր է անում, գտել է նրան, առաջարկել է բնակվել նրա ընտանիքում: Առժամանակ մոր հետ է ապրել, այնուհետ տեղափոխվել է հորաքրոջ տուն, այդպես էլ չկողմնորոշվելով՝ ում հետ շարունակել կյանքը :
Քննչականից տեղեկացնում են, որ Ստյոպա Ավագյանը շրջապատ անգամ չի ունեցել, փաստորեն իր հոգեապրումները չի կիսել ոչ մեկի հետ: Իհարկե, սա վարկածներից մեկն է, այս պահին ընթանում է նախաքննություն:
Նունե ԱՐԵՎՇԱՏՅԱՆ
Կարդացեք նաև
Տեսանյութը՝ Գագիկ Շամշյանի
