Հենց նոր Aravot.am-ը ահազանգ ստացավ Աշոցքի բնակիչներից այն մասին, որ իրենք գյուղովի վաղ առավոտից փակել են Երևան տանող ճանապարհը` կառավարությունից պահանջելով հետ վերցնել Աշոցքի զինկոմիսարատը Ամասիա տեղափոխելու մասին որոշումը: Բողոքավորների ներկայացնելով` զինկոմը սպասարկում է այս տարածաշրջանի մոտ 10 հազար բնակիչների, իսկ հիմա մի թուղթ վերցնելու համար ստիպված են սար ու ձոր ընկնել, հսկայական ճանապարհ կտրել, մեծ ծախսեր անել ու Ամասիա հասնել: Չհաշված այն, որ Աշոցքի բնակիչներից շատերը ստիպված կկորցնելնիրենց աշխատատեղերը: «Մեր մոտի բնակիչները թվով շատ ավելին են, քան Ամասիայինը, սա չտրամաբանված ու անարդար որոշում է, որի դեմ մենք մի քանի ամիս է` պայքարում ենք»,-ասում էին բողոքավորները, պնդելով, թե այդ որոշումը արդյունք է այն բանի, որ մի բարձրաստիճան պաշտոնյա` ծնունդով Ամասիայից, այնպես է արել, որ զինկոմիսարիատը միացվի Ամասիայի զինկոմիսարիատին: «Եթե Ամասիան թափով պաշտոնյա ունի, մենք `ոչ, դա չի նշանակում, թե մեր նկատմամբ նման խտրական վերաբերմունք պետք է ցույց տան: Այդ մարդը ամասիացիներին լավ տիրություն է անում, բայց`մեր հաշվին: Եթե աշխատատեղ է ուզում ստեղծել իր ծննդավայրում, թող նորմալ գործ դնի, ոչ թե ուրիշը հացը կտրի: Հենց նա է միջամտել, որ մեր զինկոմիսարիատը տանեն միացնեն Ամասիայի զինկոմին: Փոխնախախար Արմեն Գևորգյանն էլ նոր տարուց մի քանի օր առաջ եկավ, մեր բողոքը լսեց, խոստումներ տվեց ու մոռացավ», -նեղսրտում էին մեր զրուցակիցները: Վերջիններս հատկապես վրդովվել էին այն փաստից, որ փոխնախարարական մակարդակով որոշվել էր հարցը լրացուցիչ քննարկման դնել ու տեղափոխումը 3 ամսով հետաձգել, սակայն նոր տարվա տոները չավարտված` անակնկալ են մատուցել: Մենք պարզեցինք, որ Աշոցքում տեղակայված զինկոմը սպասարկում է նաև Ամասիայի բնակչությանը, իսկ Աշոցքը 25 գյուղ ունի` 10 հազար բնակչով, մինչդեռ Ամասիայում բնակչության թիվը մոտ 5-6 հազարի է հասնում, բնականաբար և Աշոցքից բանակ գնացողների թիվը շատ ավելին է, զինկոմում աշխատողների թիվը` նմանապես: Մի խոսքով պայմանները գրեթե հավասարազոր են, մի բան էլ Աշոցքինը առավել, հետևաբար և այս տեղանքի բնակիչների համար անհասկանալի է մնում զինոկմի վարչական շենքը Աշոցքից Ամասիա տեղափոխելու իմաստը: Այս պահին Աշոցք է մեկնել Շիրակի փոխմարզպետ Սեյրան Պետրոսյանը, նա հանդիպել է զինկոմի դիմաց հավաքված մարդկանց հետ, պաշտոնյան մեզ հեռախոսով փոխանցեց, որ մարզպետ Գիզիրյանը խոսել է նախարարի հետ, փորձում է հարցը կարգավորել:
Նունե ԱՐԵՎՇԱՏՅԱՆ
