Այսօր՝ հունվարի 7-ին, Երևանում կանխվել է հերթական ինքնասպանությունը: Ինչպես դեպքի վայրից հայտնում է ֆոտոլրագրող Գագիկ Շամշյանը՝ժամը 21:00- ի սահմաններում Արտակարգ իրավիճակների նախարարության Հայաստանի փրկարար ծառայության օպերատիվ կառավարման կենտրոն ահազանգ է ստացվել, որ մի երիտասարդ ցանկանում է ինքնասպանության նպատակով իրեն ցած նետել Դավիթաշեն կամրջից:
Դեպքի վայր ժամանած Արտակարգ իրավիճակների նախարարության Հայաստանի փրկարար ծառայության փրկրարաներին հաջողվել է քաղաքացիների հետ համոզել երիտասարդին, և կանխվել է նրա ինքնասպանությունը:
Քիչ առաջ երիտասարդին փրկարարները հանձնեցին դեպքի վայր ժամանած ոստիկանության Մաշտոցի բաժնի աշխատակիցներին, ովքեր նրան տեղափոխեցին ոստիկանություն:
Ֆոտոլրագրողը հայտնում է, որ երիտասարդը Ավան վարչական շրջանի Դուրյան թաղամասի բնակիչ 30-ամյա Անդրանիկ Եղիազարյանն է, որն ամուսնացած է, ունի 1 երեխա:
Կարդացեք նաև
Դեպքի վայրում հավաքվածները պատմել են, որ նա փրկարարներին բողոքում էր, թե ամուսնալուծված է, սակայն կինը իրեն թույլ չի տալիս տեսակցել իր աղջկան, ինչի համար էլ ինքը ցանկացել է ինքնասպան լինել:
Ֆոտոլրագրողը հայտնում է, որ սա Անդրանիկ Եղիազարյանի կողմից ինքնասպանություն կատարելու 2-րդ դեպքն է: Անցյալ տարվա նոյեմբերի 7-ին նա ցանկանում էր իրեն ցած նետել Կիևյան կամրջից, և այդ անգամ նրան փրկել էին քաղաքացիներն ու ոստիկանության Մաշտոցի բաժնի աշխատակիցները:
Փաստի առթիվ ոստիկանության Մաշտոցի բաժնում նյութեր են նախապատրաստվում:
