Ամանորից առաջ մենք տեղեկատվություն հրապարակեցինք ՕԵԿ նախագահ, համատեղության կարզով Հայաստանի Հանրապետության Անվտանգության խորհրդի քարտուղար Արթուր Բաղդասարյանի կողմից բաժանվող Ձմեռ պապիկի տոպրակների մասին։
Տոպրակի պարունակությունը հետեւյալն էր. մեկ շիշ տեղական արտադրության օղի, մեկ հատ հյութ եւ մեկ շիշ ձեթ, հավանաբար ՀՀ ռազմավարական պաշարներից: Տեղեկատվությունը հարուցել էր ՕԵԿ-ականների բուռն դժգոհությունը, որն արտահայտվեց օրերս մեր թղթակցի հետ խմբակցության ղեկավար Հեղինե Բիշարյանի երկխոսության ընթացքում։ Տիկին Բիշարյանը, մեզ մեղադրելով ՕԵԿ-ի PR-ն անելու մեջ, չսպասելով հարցին, հայտնել էր մեր թերթի հետ շփվելու ցանկության բացակայության մասին եւ անջատել էր հեռախոսը։
Մենք եւս չենք այրվում ՕԵԿ-ի հետ կամ նրանց մասին խոսելու ցանկությամբ։ Դե ինչ արած, ճաշակի հարց է։ Բայց օրերս մեր գործընկերոջ հետ կատարվածը մեկ անգամ եւս ստիպում է անդրադառնալ իշխանությանը մաս կազմող այս կազմավորմանը։ Մեր ընկերոջ տան հեռախոսով հնչած զանգով մի անձնավորություն հայտնել է, որ իր տղան տոներից առաջ ամանորյա նվեր-տոպրակ է ստացել ՕԵԿ-ի գրասենյակից եւ ըստ պայմանավորվածության, տոներից հետո պետք է ներկայանար գրասենյակ, սակայն չի ներկայացել։ Կնոջ զարմացած՝ «12 տարեկանի կուսակցականս որն է» հարցից հետո զարմանալու հերթը հասնում է զանգահարողին։ Խոսակցությունից պարզվում է, որ Հակոբ Եթիմյան անունով մեկը, Ամանորից առաջ օգտվել է ՕԵԿ-ի «բարիքներից», խոստացել է տոներից հետո անդամակցել ՕԵԿ-ին եւ պատահական հեռախոսահամար թողնելով հեռացել է:
«Երկիր»
