Այսօր Հայաստանի երիտասարդական հիմնադրամում տեղի ունեցավ Երիտասարդ առաջնորդների դպրոցի (ԵԱԴ) ավարտական հանդիպումը:
«Առաջնորդն այն մարդն է, ով խոսքը կարողանում է դարձնել գործ»,- ասում է ԵԱԴ-ի տնօրեն Արտակ Շաքարյանը:
Հանդիպման ընթացքում 69 սաներին հանձնվեցին դպրոցի դասընթացների մասնակցության վկայականներ:
2011 թվականից ԵԱԴ-ը համագործակցելով Հայաստանի երիտասարդական հիմնադրամի հետ, կազմակերպել է 2011 թվականի ընդունելությունը, որին մասնակցել է ավելի քան 139 երիտասարդ, նրանցից էլ ընդունվել է 92 դիմորդ: 69 երիտասարդներ անցնելով առաջին փուլը և ստանալով դասընթացներին մասնակցելու վկայական, կանցնեն ուսումնառության:
Կարդացեք նաև
Հայաստանի երիտասարդական հիմնադրամի նախագահ Կարեն Ավագյանը, շնորհավորելով ներկաներին, ասաց. «Առաջնորդների դպրոցը 5-6 տարվա փորձ ունի եւ այդ փորձը հաշվի առնելով Հայաստանի երիտասարդական հիմնադրամը աջակցել է ու կարողացել է անցկացնել համատեղ ծրագիր: Այս 5 տարիների ընթացքում Երիտասարդ առաջնորդների դպրոցն ունեցել է մոտ 5000 շրջանավարտ: Այն որպես ծրագիր շատ կարևոր է, քանի որ բացահայտում է երիտասարդների առաջնորդ լինելու տաղանդը, եւ նրանք, ովքեր իրենց առաջնորդ են համարում, ունեն որոշակի գիտելիքներ իրենց մասնագիտական բնագավառում, կարողանում են դպրոցի միջոցով ուսուցանել առաջնորդի հատկանիշները եւ դրանք կիրառել պրակտիկայում»:
Նա նաև խոստացավ, որ բոլոր այն շրջանավարտները, ովքեր կունենան վկայագիր և ինչ-որ ծրագրով կդիմեն երիտասարդական հիմնադրամին, այդ ծրագիրը կֆինանսավորվի:
Արամ ԱՐԱՐԱՏՅԱՆ
