Այսօր Երեւանի մամուլի ակումբը (ԵՄԱ ) ԶԼՄ-ներին ներկայացրեց «Հայաստանի եւ Թուրքիայի ԶԼՄ-ների կողմից Հայաստան-Թուրքիա հարաբերությունների լուսաբանման հիմնական միտումները» որակական հետազոտության հիմնական արդյունքները: Հետազոտության շրջանակում ուսումնասիրվել է Հայաստան-Թուրքիա հարաբերությունների լուսաբանումը Հայաստանի եւ Թուրքիայի տասը լրատվամիջոցներում՝ 2008թ. օգոստոսից մինչեւ 2010թ. սեպտեմբերն ընկած ժամանակահատվածում: Ծրագիրն իրականացվել է ԱՄՆ միջազգային զարգացման գործակալության օժանդակությամբ` կոնսորցիումի կողմից, որի կազմում ընդգրկված են Եվրասիա համագործակցություն հիմնադրամը, Երեւանի մամուլի ակումբը, Հայաստանի արդյունաբերողների եւ գործարարների միությունը: Կոնսորցիումը համագործակցել է Թուրքիայի Իզմիրի Տնտեսական համալսարանի հաղոդակցության ֆակուլտետի հետ:
ԵՄԱ նախագահ Բորիս Նավասարդյանը տեղեկացրեց, որ հետազոտություններն իրականացել են երկու փուլով. «Առաջին փուլում հետադարձ հայացք է նետվել 2007-2010թթ.-ներին, երբ փորձ էր արվում ներկայացնել հայ–թուրքական հարաբերությունների ակտիվացումը: Իսկ երկրորդ փուլն ընդգրկում է 2010թ.-ից մինչ օրս կատարված ուսումնասիրությունները»: Պարոն Նավասարդյանը հավելեց, որ ԶԼՄ-ների հրապարակումները հիմնականում կրել են քարոզչական եւ տեղեկատվական բնույթ:
Եվրասիա համագործակցություն հիմնադրամի նախագահ Գեւորգ Տեր-Գաբրիելյանը նշեց, որ ծրագիրն ընդգրկում է մի շարք ուղղություններ, մասնավորապես` բիզնես հարաբերություններ եւ աշխատանքային-մշակութային կապեր. «Ծրագիրն իր բովանդակությամբ ընդարձակ է, տվել է կարեւոր արդյունք եւ միավորում է խնդրով հետաքրքրված բոլոր հասարակական կազմակերպություններին»:
ԱՄՆ Միջազգային զարգացման գործակալության ժողովրդավարության եւ կառավարման բաժնի ղեկավար Սթիվեն Բրեյգերը նշեց, որ ԱՄՆ-ը սատարում է հայ-թուրքական հարաբերությունների կարգավորմանն ուղղված կոնսորցիումի ջանքերը. «Անվտանգության տեսանկյունից դա չափազանց կարեւոր է Հայաստանի համար: Առկա է երկու երկրների լրատվամիջոցների կողմից հավասարաչափ լուսաբանման խնդիր, քանի որ հաճախ ինֆորմացիայի անհասանելիության պատճառով լրագրողները ներկայացնում են միայն երկրի կառավարության դիրքորոշումը»:
Կարդացեք նաև
Բանախոսները նշեցին, որ ըստ ուսումնասիրուոթյունների արդյունքների` Հայաստան-Թուրքիա հարաբերությունները Հայաստանի ԶԼՄ-ներում արժանացել են ավելի մեծ ուշադրության, քան Թուրքիայի ԶԼՄ-ներում: Հայաստանյան լրատվամիջոցները թեմայի շուրջ հրապարակել են 3088, իսկ Թուրքիայի ԶԼՄ-ները` 1607 նյութ: Թուրքական լրատվամիջոցներում ԱՄՆ վարչակազմը հաճախ ներկայացվում էր իբրեւ կարեւորագույն դերակատար: «Նույնիսկ ԱՄՆ–ի դերը ներկայացվում էր որպես ավելի կարեւոր, քան Հայաստանինը, իսկ գործընթացն առավելապես ներկայացվում էր որպես ԱՄՆ–Թուրքիա հարաբերություններ: Երկու երկրների լրատվամիջոցները քիչ են կենտրոնացել ներքին քաղաքական իրավիճակների, սոցիալական խնդիրների վրա»,- ասված է ծրագրի ամփոփագրում: Հետազոտությունն իրականացնողներն առաջարկեցին Հայաստան-Թուրքիա հարաբերությունների լուսաբանման հարցում լինել հավասարակշիռ, ընդլայնել լուսաբանման շրջանակները եւ այլ երկրների տեղեկատվական աղբյուրների օգտագործումը, ինչպես նաեւ` հաստատել անմիջական կապեր մյուս երկրների լրագրողների եւ փորձագետների հետ:
Լուիզա ՍՈՒՔԻԱՍՅԱՆ
