Օրերս Գ. Սունդուկյանի անվան թատրոնում կայացավ Սուրեն Սաֆարյանի բեմադրած «Սիրահարված տաքսիստը» ներկայացման պրեմիերան՝ ըստ Ռեյ Կյունիի «Run for your Wife» գործի: Թարգմանությունը եւ բեմական տարբերակը Լեւոն Մութաֆյանինն էին, զգեստների ձեւավորումը՝ Հասմիկ Աղայանինը:
Դերերում հանդես եկան Դավիթ Թադեւոսյանը, Աննա Հարությունյանը, Ռոզի Ավետիսովան, Անդրանիկ Էթեմեզյանը, Մարի Գրիգորյանը եւ Սարգիս Հակոբյանը:
«Սիրահարված տաքսիստը» կատակերգական ներկայացում է, որտեղ հերոսներն անկախ իրենց կամքից հայտնվում են ծիծաղելի իրավիճակներում եւ էլ ավելի ծիծաղելի կերպով դուրս գալիս այդ իրավիճակներից:
Գլխավոր հերոսը՝ տաքսու վարորդ Ջոն Սմիթը, զուգահեռ փողոցներում ապրող երկու կին ունի, երկուսին էլ շատ է սիրում: Նա հստակ գրաֆիկով այցելում է իր կանանց եւ միշտ կարողանում է իրեն այնպես պահել, որ տիկնայք կասկածներ չունենան ամուսնական հավատարմության վրա: Բայց մի օր «ամուսնական» գրաֆիկը խախտվում է…Ավազակներից տատիկին փրկելու արդյունքում Սմիթը հայտնվում է հիվանդանոցում եւ ոստիկանության տարբեր աշխատողների տալիս իր 2 տների հասցեները: Ընտանեկան խառնաշփոթն արդեն պատրաստ է…
Կարդացեք նաև
Ռեյ Կյունիի հանրահայտ գործը, որ համարվում է 20-րդ դարի բրիտանական 100 լավագույն պիեսներից մեկը, կատակերգություն է, որը ենթադրում է՝ դահլիճը պիտի պայթի ծիծաղից ու չլարվի, «զոռ չտա» ինտելեկտին: Մյուս կողմից էլ՝ կատակերգությունը դեռ չի նշանակում ջրիկություն կամ ճղճղոց բեմում, ինչի ականատեսը եղանք Սունդուկյան թատրոնում: Դերասանները՝ հիմնականում սերիալային, մի քիչ ավելի էին ճիգ գործադրում՝ հանդիսատեսին զվարճացնելու համար, ինչը արհեստականություն էր հաղորդում նրանց կերպարներին: Իհարկե կային հաջողված կտորներ. տեղ-տեղ լավ էր խաղում Դավիթ Թադեւոսյանը, որը լայն հանրությանը հայտնի է որպես Արամ՝ «Եզրագծից այն կողմ» հեռուստասերիալից: Սարգիս Հակոբյանը՝ նույն սերիալի ոստիկան Սեւակը, որը միշտ «իր ափսեում է զգում» իրավապահի կերպարում, տվյալ պարագայում էլի հաջողված ոստիկան էր, Մարի Գրիգորյանը նախկինում ավելի լավ է հանդես եկել այլ ներկայացումներում, օրինակ՝ «Պաղտասար աղբար», «Ինկած բերդի իշխանուհին» եւ այլն:
«Սիրահարված տաքսիստը» բեմադրությանը կարելի է խիստ չմոտենալ մեկ վերապահումով, որ ռեժիսորից սկսած, դերասաններով ավարտած, բոլորը երիտասարդներ են: Ի դեպ, բավականին հաջող էր բեմի ձեւավորումը: Ինչ վերաբերում է ներկայացմանը, այն «միագիծ» էր ու ընդհանուր առմամբ տաղտկալի, չնայած կազմը ի վիճակի էր ավելի գունեղ, աշխույժ եւ «համով» ներկայացում անելու: Անկեղծ ասած՝ վերնագիրն էլ մի բան չէր, մանավանդ տաքսիստը հայերեն բառ չէ:
ԳՈՀԱՐ ՀԱԿՈԲՅԱՆ
«Առավոտ» օրաթերթ
