Մեզանում կարծես «ավանդույթ» է դարձել սեփական հուշարձանների կողոպուտը՝ մասամբ կամ ամբողջովին: Վերջերս «Առավոտի» ընթերցողներից Վահագն Գրիգորյանը լուսանկարներ էր ուղարկել մեզ, որտեղ պարզորոշ երեւում էին, թե ինչ լուրջ վնասվածքներ ունի Տորք Անգեղի՝ Նորքի զանգվածում 1982 թվականին կանգնեցված արձանը (հեղինակ՝ Կառլեն Նուրիջանյան):
Հերթական ահազանգը «Առավոտը» ստացավ օրերս՝ Ազգային օպերային թատրոնի մեներգիչ Վահագն Մարգարյանից. Երեւան-Սեւան մայրուղու Չարենցավանի հատվածում 1974թ. տեղադրված՝ քանդակագործ Դավիթ Բեջանյանի ավելի քան 20 մ բարձրության «Հավերժության ժապավեն» պղնձաձույլ արձանը վերջին շրջանում մաս-մաս թալանվում է:
Երեք օր է՝ մեզ չի հաջողվում կապվել Կոտայքի մարզպետի մամուլի քարտուղար Կարեն Մարգարյանի հետ՝ ասվածի առիթով պարզաբանում ստանալու համար: Հավանաբար այնտեղ եւս բոլորը զբաղված են ընտրական գործընթացներով: Ամեն դեպքում, անհամբեր սպասում ենք Կոտայքի մարզպետարանի պաշտոնական պատասխանին՝ քանդակի ճակատագրի հետ կապված:
ՍԱՄՎԵԼ ԴԱՆԻԵԼՅԱՆ
