Հունիսի 5-ին Տավուշի մարզի առաջին ատյանի դատարանում, դատավոր Զոյա Զաքինյանի նախագահությամբ, կայացել է Իջեւանի գնդի նախկին հրամանատար Սերգեյ Կարապետյանի եւ նույն գնդի գումարտակի նախկին հրամանատար Հրանտ Դալլաքյանի դատավարության հերթական նիստը: Նիստում շարունակվել եւ ավարտվել է գործում առկա փաստաթղթերի 5 հատորների հրապարակումը: Գնդապետ Ս. Կարապետյանը դատարանում ցուցմունքներ չի տվել՝ հայտարարելով, որ ցուցմունքներ կտա միայն գործով 3 տուժողների ներկայությամբ: Վերջիններս նախկինում դատարանում ցուցմունքներ են տվել, սակայն վերջին մի քանի նիստերին ներկա չեն եղել: Դատարանը նրանց բերման ենթարկելու որոշում է ուղարկել, ոստիկանությունից հայտնել են, որ գործով տուժող 3 երիտասարդները գտնվում են Ռուսաստանում:
Հաջորդ նիստը նշանակված է հուլիսի 2-ին: Հաջորդ նիստին դատարանում հարցեր կուղղեն սույն գործով ներգրավված դատական հոգեբանին: Հիշեցնեմ, որ Իջեւանի գնդի նախկին հրամանատար Սերգեյ Կարապետյանը եւ գումարտակի նախկին հրամանատար Հրանտ Դալլաքյանը իրենց մեղավոր չեն համարում: Այս դատավարությունը սկսվել է 2011թ. դեկտեմբերի 8-ին: Քրեական գործի պատմությունը հետեւյալն է. Իջեւանի տարածաշրջանից չորս երիտասարդներ 2010թ. դեկտեմբերի 31-ին՝ տարեմուտից մի ժամ առաջ, ջերմության դեմ դեղորայք են տարել իրենց ընկերներից մեկի եղբորը, ով վերոհիշյալ զորամասում է ծառայում: Նրանց հանդիպել է զորամասի հրամանատար, գնդապետ Սերգեյ Կարապետյանը: Վերջինս զայրացել է նրանց այցից, հրամանատարի եւ երիտասարդների միջեւ վեճ եւ ընդհարում է եղել: Կարապետյանը նրանց բերման է ենթարկել իր աշխատասենյակ: Ահաբեկված տղաները ցատկել են նրա աշխատասենյակի երկրորդ հարկից: Դրա հետեւանքով Իջեւանի Գետահովիտ գյուղի 20-ամյա բնակիչ Տարոն Ենգիբարյանը գլխի ծանր վնասվածքներ էր ստացել, իսկ 21-ամյա Աշոտ Ուլիխանյանը՝ ձախ ոտքի կոտրվածք: Տարոնին տեղափոխել էին Իջեւանի հիվանդանոց, ապա՝ Երեւանի «Սուրբ Գրիգոր Լուսավորիչ» բժշկական կենտրոն: 10 օր հետո գիտակցության չգալով՝ Տարոն Ենգիբարյանը մահացել է:
Ոսկան ՍԱՐԳՍՅԱՆ
Կարդացեք նաև