Տավուշի մարզի Բերդի տարածաշրջանի Չինարի գյուղում, սահմանագծից 700 մետր հեռավորությամբ գործում է գյուղի մանկապարտեզը: Մանկապարտեզի տնօրեն Փառանձեմ Աղասյանն ասաց, որ այս տարի դպրոց են ճանապարհելու իրենց 6 սաների: Ներկայումս Չինարիի մանկապարտեզ է հաճախում 2-5 տարեկան 23 երեխա, աշնանը նրանց թիվը կհասնի 28-30-ի: Նախադպրոցական հաստատության կարիքների համար երեխաների ծնողներից ամսական 1500 դրամ է գանձվում: Այս տարի ՀՕՖ-ը տրամադրել է երեխաների սննդի տարեկան գումարը՝ 770 հազար դրամ: Համայնքի բյուջեից վճարվում են մանկապարտեզի 4 աշխատողների աշխատավարձերը, նախադպրոցական հաստատության պահպանման ծախսերը: Մանկապարտեզի տնօրենն ասաց, որ իրենց սաները չեն վախենում կրակոցներից, կրակոցները նրանց համար սովորական են դարձել: Ադրբեջանական գնդակոծությունների ժամանակ դաստիարակները խաղերով, բարձր երաժշտությամբ զբաղեցնում են փոքրիկներին, շեղում նրանց ուշադրությունը կրակոցներից:
Ոսկան ՍԱՐԳՍՅԱՆ
